ବର୍ଷା ବିତ୍ପାତ, ଗଲାଣି ୬୨୪ ଜୀବନ

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ମୌସୁମୀ ଯୋଗୁଁ ଦେଶରେ ଲାଗି ରହିଛି ବର୍ଷା । ପୁରା ଉତ୍ତର ଭାରତରେ ବର୍ଷା ବିତ୍ପାତ ଦେଖିବାକୁ ମିଳିଛି । ମୌସୁମୀ ଜନିତ ବର୍ଷା ପାଇଁ ଏପର୍ଯ୍ୟନ୍ତ ଦେଶରେ ୬୨୪ ଜଣଙ୍କ ଜୀବନ ଗଲାଣି । ପ୍ରବଳ ବର୍ଷା ଯୋଗୁଁ ବହୁ ଧନ ଜୀବନ ମଧ୍ୟ ନଷ୍ଟ ହୋଇଛି । ଦିଲ୍ଲୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଯମୁନା ନଦୀରୁ ଜଳସ୍ତର କମୁଥିଲେ ମଧ୍ୟ ଏବେ ବି ବିପଦ ସଙ୍କେତ ଉପରେ ଏହାର ଜଳସ୍ତର ରହିଛି । ଦେଶର ରାଜଧାନୀ ଏକ ପ୍ରକାର ଜଳବନ୍ଦୀ ହୋଇ ରହିଛି ।

ଅସ୍ଥାୟୀ ଶିବିରରେ ହଜାର ହଜାର ଲୋକେ ଆଶ୍ରୟ ନେଇଛନ୍ତି । ପ୍ରାୟ ୨୭ ହଜାର ଲୋକ ଅସ୍ଥାୟୀ ଶିବିରରେ ଆଶ୍ରୟ ନେଇଛନ୍ତି । ହିମାଞ୍ଚଳ ପ୍ରଦେଶରେ ସର୍ବାଧିକ ୨୨୩ ମିଲିମିଟର ବର୍ଷା ରେକର୍ଡ କରାଯାଇଛି । ଯାହା ଗତ ୫୦ ବର୍ଷ ମଧ୍ୟରେ ସର୍ବାଧିକ ବୋଲି କୁହାଯାଉଛି । ପ୍ରବଳ ବର୍ଷା ଯୋଗୁ ୬୦ ହଜାର ଲୋକ ପାଣିଘେରରେ ଫଶି ରହିଥିବା ବେଳେ ଉଦ୍ଧାର କାର୍ୟ୍ୟ ଜାରି ରହିଛି । ବର୍ଷା ଯୋଗୁଁ ହିମାଞ୍ଚଳ ପ୍ରଦେଶରେ ୯୯, କର୍ଣ୍ଣାଟକରେ ୮୭, ରାଜସ୍ଥାନରେ ୩୬ ଜଣଙ୍କ ମୃତ୍ୟୁ ହୋଇଛି ।