‘ଯୋଗୀ କିମ୍ବା ସନ୍ୟାସୀଙ୍କ ପାଦ ଛୁଇଁବା ଏବଂ ସେମାନଙ୍କ ଆଶୀର୍ବାଦ ପାଇବା ମୋର ଅଭ୍ୟାସ’

ମୁମ୍ବାଇ(ବଡ଼ ଖବର ବ୍ୟୁରୋ): ନିକଟରେ ସୁପରଷ୍ଟାର ରଜନୀକାନ୍ତ ଲକ୍ଷ୍ନୌରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଭେଟିଥିଲେ। ଏହି ସମୟରେ ସେ ମୁଖ୍ୟମନ୍ତ୍ରୀ ଯୋଗୀଙ୍କ ପାଦ ଛୁଇଁଥିବାର ନଜର ଆସିଥିଲେ। ଯାହାକୁ ନେଇ ବିବାଦ ମଧ୍ୟ ହୋଇଥିଲା। ରଜନୀକାନ୍ତ ଜଣେ ବୟସ୍କ ଲୋକ ହୋଇ ମଧ୍ୟ ନିଜଠାରୁ ସାନ ଲୋକଙ୍କ ପାଦ ଛୁଇଁବା କଥାକୁ ପସନ୍ଦ କରିନଥିଲେ ଲୋକ। ଯୋଗୀ ଆଦିତ୍ୟନାଥଙ୍କ ପାଦ ଛୁଇଁବା ନେଇ ବିବାଦ ପ୍ରସଂଗରେ ନିଜ ମତ ରଖିଛନ୍ତି ରଜନୀକାନ୍ତ। କହିଛନ୍ତି ଯୋଗୀ କିମ୍ବା ସନ୍ୟାସୀଙ୍କ ପାଦ ଛୁଇଁବା ଏବଂ ସେମାନଙ୍କ ଆଶୀର୍ବାଦ ପାଇବା ମୋର ଅଭ୍ୟାସ। ସେମାନେ ମୋ ଠାରୁ ସାନ ହୋଇଥିଲେ ମଧ୍ୟ ମୁଁ ତାହା କରିଥାଏ।

ପିଟିଆଇର ସୂଚନା ଅନୁଯାୟୀ, ସାଉଥ ସୁପରଷ୍ଟାର ତାଙ୍କ ମୁଭି ‘ଜେଲର’ର ସଫଳତା ପାଇଁ ଦର୍ଶକଙ୍କୁ ଧନ୍ୟବାଦ ଜଣାଇଛନ୍ତି। ଏଥି ସହିତ, ଯେତେବେଳେ ତାଙ୍କୁ ୨୦୨୪ ଲୋକ ସଭା ନିର୍ବାଚନ ବିଷୟରେ ଏକ ପ୍ରଶ୍ନ ପଚରାଯାଇଥିଲା, ସେତେବେଳେ ସେ କହିଥିଲେ ଯେ ସେ ରାଜନୀତି ବିଷୟରେ କିଛି କହିବାକୁ ଚାହାଁନ୍ତି ନାହିଁ। ଅଭିନେତା ଗତ କିଛି ଦିନ ଧରି ନିରନ୍ତର ଯାତ୍ରା କରୁଛନ୍ତି। ତାଙ୍କ ଫିଲ୍ମ ‘ଜେଲର’ ବକ୍ସ ଅଫିସରେ ଧମାଲ କରୁଛି। ଏହି ସମୟରେ, ରଜନୀକାନ୍ତଙ୍କୁ ମଧ୍ୟ ମୁଖ୍ୟମନ୍ତ୍ରୀ ଯୋଗୀଙ୍କ ପାଦ ଛୁଇଁବା ପାଇଁ ଟ୍ରୋଲ କରାଯାଉଛି।