ବ୍ରଜରାଜନଗର, (ବଡ଼ ଖବର ବ୍ୟୁରୋ): ରବିବାର ବିଳମ୍ବିତ ରାତି ଟ୍ରକ ଧକ୍କାରେ ଗାନ୍ଧିଛକ ଗୋଲେଇ ନଷ୍ଟ ହୋଇଯାଇଥିବା ବେଳେ ଛକରେ ଥିବା ହାଇମାଷ୍ଟ ଲାଇଟ ଉପୁଡ଼ିଯାଇଛି। ସୂଚନା ଅନୁସାରେ, ଗତ ରାତି ପ୍ରାୟ ୧ଟା ସମୟରେ ବେଳପାହାଡ଼ ପଟୁ ଆସୁଥିବା ଟ୍ରକ ଗାନ୍ଧିଛକ ଗୋଲେଇକୁ ଧକ୍କା ଦେଇ ତା ଉପରେ ଚଢ଼ି ଯାଇଥିଲା। ଦୁର୍ଘଟଣା ଯୋଗୁ ଗାନ୍ଧିଛକକୁ ଆଲୋକିତ କରୁଥିବା ହାଇମାଷ୍ଟ ଲାଇଟ କ୍ଷତିଗ୍ରସ୍ତ ହୋଇଥିବା ବେଳେ ଲାଇଟ ଖୁଣ୍ଟଟି ଗାଡି ତଳେ ଚାପି ହୋଇ ରହିଥିଲା। ଖବର ପାଇ ବ୍ରଜରାଜନଗର ଆଇଆଇସି ଲଳିତା ମୋଦି ଏବଂ ଗାନ୍ଧିଛକ ଫାଣ୍ଡି ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଦୁର୍ଘଟଣାଟି ବ୍ୟସ୍ତ ବହୁଳ ୪୯ ନମ୍ବର ଜାତୀୟ ରାଜପଥ ତଥା ବ୍ରଜରାଜନଗରର ପ୍ରବେଶ ପଥରେ ଘଟିଥିବାରୁ ପୋଲିସ ତୁରନ୍ତ ଟ୍ରକକୁ ରାସ୍ତାରୁ ହଟାଇଥିଲା। କ୍ଷତିଗ୍ରସ୍ତ ହାଇମାଷ୍ଟ ଲାଇଟକୁ ମଧ୍ୟ ଅନ୍ୟ ଜାଗାକୁ ସ୍ଥାନାନ୍ତର କରିଥିଲା। ଅପରପକ୍ଷେ ଦୁର୍ଘଟଣା ଘଟାଇଥିବା ଟ୍ରକଟି ଝାଡ଼ଖଣ୍ଡର ହୋଇଥିବା ବେଳେ ଚାଳକ ଘଟଣାସ୍ଥଳରୁ ଫେରାର ହୋଇଯାଇଥିବା ଆଇଆଇସି ମୋଦି କହିଛନ୍ତି।
