ଦ୍ଵିତୀୟ ଦିନରେ ଅନଶନ: ପ୍ରଶାସନ ସହ ତୃତୀୟ ପର୍ୟ୍ୟାୟ ଆଲୋଚନା ବିଫଳ

ପିପିଲି, (ବଡ଼ ଖବର ବ୍ୟୁରୋ): ୫ ଦଫା ଦାବି ନେଇ ପିପିଲି ସରକାରୀ ଡାକ୍ତରଖାନା ସମ୍ମୁଖରେ ଜାରି ରହିଛି ଆମରଣ ଅନଶନ। ସୋମବାରଠାରୁ ଆରମ୍ଭ ହୋଇଥିବା ଏହି ଅନଶନ ଆଜି ଦ୍ଵିତୀୟ ଦିନରେ ପହଞ୍ଚିଛି। ତେବେ ପ୍ରଥମ ଦିନରେ ପ୍ରଶାସନ ସହ ଅନଶନକାରୀଙ୍କ ତୃତୀୟ ପର୍ୟ୍ୟାୟ ଆଲୋଚନା ବିଫଳ ହୋଇଛି। ବିଭିନ୍ନ ରାଜନୈତିକ ଦଳ ଏବଂ ସାମାଜିକ ସଂଗଠନ ପକ୍ଷରୁ ଆମରଣ ଅନଶନକୁ ବିପୁଳ ସମର୍ଥନ ମିଳିଛି । ସୋମବାର ରାତିରେ ବିଜେପି ଜିଲ୍ଲା ସଭାପତି ଆଶ୍ରିତ ପଟ୍ଟନାୟକ ଧାରଣାସ୍ଥଳରେ ପହଞ୍ଚିଥିଲେ।

ଆଜି ପୁନର୍ବାର ଆସି ଅନଶନକାରୀଙ୍କ ସହ ଯୋଡ଼ିହୋଇ ପ୍ରଶାସନ ନିକଟରେ ଦାବି ରଖିଛନ୍ତି। ଜିଲ୍ଲା ବିଜେପି ଅନଶନକାରୀଙ୍କ ସହ ରହିଛି ବୋଲି ପଟ୍ଟନାୟକ ପ୍ରତିକ୍ରିୟା ରଖିଛନ୍ତି। ଆଜି କଂଗ୍ରେସ ନେତ୍ରୀ ନିରୁପମା ପାତ୍ର ଏବଂ ଉତ୍କଳ ସାମ୍ବାଦିକ ସଂଘ ସାଧାରଣ ସମ୍ପାଦକ ପୂର୍ଣଚନ୍ଦ୍ର ନାୟକ ସେମାନଙ୍କ ସମର୍ଥନ ଜଣାଇବା ସହ ପ୍ରତିକ୍ରିୟା ରଖିଛନ୍ତି। ଧାରଣାସ୍ଥଳରୁ ପଟ୍ଟନାୟକ ସିଡିଏମଓଙ୍କୁ ଫୋନ ଯୋଗେ ଯୋଗାଯୋଗ କରି ଯଥାଶୀଘ୍ର ଅନଶନକାରୀଙ୍କ ଦାବି ପୂରଣ କରିବାକୁ ଆଲୋଚନା କରିଥିଲେ।