ରାଇଘର(ବଡ଼ ଖବର ବ୍ୟୁରୋ): ନବରଙ୍ଗପୁର ଜିଲ୍ଲାରେ ପୁଣି ଦେଖିବାକୁ ମିଳିଛି ଜନନୀ ଯନ୍ତ୍ରଣା । ଦୀର୍ଘ ୩ କିଲୋମିଟର କିଟି କିଟି ଅନ୍ଧାର ରାତିରେ ଖଟିଆରେ ବୁହାହେଲେ ଗର୍ଭବତୀ । ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ତେଲନଦୀ ପଞ୍ଚାୟତ ର କୁନିନାଲ ଗାଁର ଲୁଲୁ ମୁଦୁଲିଙ୍କ ସ୍ତ୍ରୀ ଛବି ମୁଦୁଲି ୪ ମାସର ଗର୍ଭବତୀ ଥିବା ବେଳେ ହଠାତ ପେଟ ବ୍ୟଥା ହେବାରୁ ମେଡିକାଲକୁ ନେବା ପାଇଁ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ ।
କିନ୍ତୁ ଝରିଗାଁ ମେଡ଼ିକାଲରେ ଆମ୍ବୁଲାନ୍ସ ନଥିବାରୁ ଏମଏଚୟୁ ଗାଡ଼ିଟି ଗର୍ଭବତୀ ଙ୍କୁ ଆଣିବାକୁ ଯାଇ ଗାଁ ରେ ପହଞ୍ଚି ନପାରି ଦୀର୍ଘ ୩ କିଲୋମିଟର ଦୂର ଖଦ୍ରାପାଣି ଡାଲଖାଇ ଛକ ନିକଟରେ ଅଟକି ରହିଥିଲା । ପରେ ପରିବାର ଏବଂ ଗ୍ରାମବାସୀ ଛବିଙ୍କୁ କିଟି କିଟି ଅନ୍ଧାର ରାତିରେ ଏକ ଖଟିଆ ସାହାଯ୍ୟ ରେ ବହି ଆଣି ଏମଏଚୟୁ ଗାଡ଼ି ନିକଟରେ ପହଞ୍ଚାଇ ଝରିଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ତେବେ ଗର୍ଭବତୀ ଛବିଙ୍କ ପ୍ରାଥମିକ ଚିକିତ୍ସା ପରେ ଏବେ ସୁସ୍ଥ ଥିବା ଡାକ୍ତର କହିଛନ୍ତି ।
