ଜାଲରେ ପଡିଲା ଅଢେଇ କ୍ୱିଣ୍ଟାଲର ବିରଳ ମାଛ

ପାରାଦ୍ୱୀପ(ବଡ଼ ଖବର ବ୍ୟୁରୋ):ଗଭୀର ସମୁଦ୍ରରେ ମାଛ ଓ ମତ୍ସ୍ୟଜୀବୀଙ୍କ ମଧ୍ୟରେ ପାଖାପାଖି ଦେଢଘଣ୍ଟାର ସଙ୍ଘର୍ଷ ପରେ ଜାଲରେ ପଡିଲା ପାଖାପାଖି ଅଢ଼େଇ କ୍ଵିଣ୍ଟାଲର ବିରଳ ମାଛ । ଯାହାକୁ ନେଇ ପାରାଦ୍ଵୀପ ଅଠରବାଙ୍କି ବାଲିପ୍ଲଟରେ ଲୋକଙ୍କ ଭିଡ଼ ଦେଖିବାକୁ ମିଳିଛି। ମାଛଟିର ଓଜନ ପାଖାପାଖି ଅଢ଼େଇ କ୍ଵିଣ୍ଟାଲ ହେବ ବୋଲି ଅନୁମାନ କରାଯାଉଥିବା ବେଳେ , ଏହାର ମୁହଁ ବାଦୁଡି ଭଳି ଦେଖାଯାଉଛି ଏବଂ ସାଙ୍କୁଚ ଭଳି ଛୋଟ ଲାଙ୍ଗୁଡ ମଧ୍ୟ ରହିଛି।

ଏହାକୁ ସ୍ଥାନୀୟ କିଛି ମତ୍ସ୍ୟଜୀବୀ ଚିଲ ମାଛ କହୁଥିବା ବେଳେ କିଛି ଲୋକ ଏହାକୁ ଶଙ୍କର ଜାତୀୟ ଶାଙ୍କୁଚ ବୋଲି କହୁଛନ୍ତି। ଗତକାଲି ବାଲିପ୍ଲଟର ମା ଆଶିର୍ବାଦ ନାମକ ଯନ୍ତ୍ର ଚାଳିତ ଡଙ୍ଗା ସମୁଦ୍ରକୁ ମାଛ ମାରିବାକୁ ଯାଇଥିଲା। ମତ୍ସ୍ୟଜୀବୀମାନେ ସମୁଦ୍ରରେ ଜାଲ ପକାଇ ଟାଣିବା ସମୟରେ ଜାଲ ସହିତ ଡଙ୍ଗାକୁ ଘୋଷାରି ନେଇଥିଲା ମାଛଟି। ଡଙ୍ଗାରେ ଥିବା ମତ୍ସ୍ୟଜୀବୀମାନେ ଭୟଭୀତ ହୋଇପଡ଼ିବା ସହିତ ପାଖରେ ମାଛ ଧରୁଥିବା ଅନ୍ୟ ଡଙ୍ଗାର ମତ୍ସ୍ୟଜୀବୀଙ୍କୁ ଡାକିଥିଲେ।

ଗଭୀର ସମୁଦ୍ରରେ ମାଛ ଓ ମତ୍ସ୍ୟଜୀବୀଙ୍କ ମଧ୍ୟରେ ବେଶ୍ କିଛି ସମୟ ସଙ୍ଘର୍ଷ ପରେ ମାଛକୁ ଡଙ୍ଗାକୁ ଆଣିବାରେ ସକ୍ଷମ ହୋଇଥିଲେ ମତ୍ସ୍ୟଜୀବୀ। ଉକ୍ତ ମାଛକୁ ଓ୍ବେଷ୍ଟବେଙ୍ଗଲର ଦିଘା ପଠାଯାଇଥିବା ବେଳେ ମାଛର ପ୍ରକୃତ ମୂଲ୍ୟ ଜଣାପଡ଼ିନାହିଁ। ସେଠାରେ ଉକ୍ତ ମାଛର ନିଲାମ କରାଯିବା ପରେ ଏହାର ମୂଲ୍ୟ ଜଣାପଡିବ। ମାଛଟିର ପୁଟ୍ଟି ଓ ଲାଙ୍ଗୁଡ ଔଷଧ ତିଆରିରେ ବ୍ୟବହାର ହେବ ବୋଲି ଜଣାପଡିଛି।