ଏଟିଏମ୍ ଭିତରେ ନାଗ ସାପ

ସମ୍ବଲପୁର, (ବଡ଼ ଖବର ବ୍ୟୁରୋ): ଏଟିଏମ୍ ଭିତରେ ନାଗସାପ। କଥାଟା ଶୁଣିଲେ ଆପଣଙ୍କୁ ନିଶ୍ଚିତ ଆଶ୍ଚର୍ଯ୍ୟ ଲାଗିପାରେ କିନ୍ତୁ ସମ୍ପୂର୍ଣ୍ଣ ସତ। ଏପରି ଘଟଣା ଦେଖିବାକୁ ମିଳିଛି ସମ୍ବଲପୁର ଜିଲ୍ଲା କୁଚିଣ୍ଡାର ଏକ ପୋଷ୍ଟାଲ ଏଟିଏମରେ। କୁଚିଣ୍ଡା ସହରର ପଞ୍ଚମୁଖୀ ଛକରେ ଥିବା ଏହି ପୋଷ୍ଟାଲ ଏଟିଏମକୁ ଟଙ୍କା ଉଠାଇବାକୁ କିଛି ଲୋକ ଆସିଥିବା ବେଳେ ନାଗ ସାପକୁ ଏଟିଏମ ଭିତରେ ଦେଖି ଭୟରେ ସେଠାରୁ ପଳାଇଥିଲେ। ପରେ ସ୍ଥାନୀୟ ଲୋକେ ଏଟିଏମ୍ ବନ୍ଦ ରଖି ବନବିଭାଗକୁ ଖବର ଦେଇଥିଲେ। କୁଚିଣ୍ଡା ବନବିଭାଗର ଏକ ଟିମ୍ ଏଟିଏମରେ ପହଞ୍ଚି ବହୁ ଖୋଜାଖୋଜି କରିବା ପରେ ବି ସାପକୁ ପାଇ ନ ଥିଲେ। ଶେଷରେ ସ୍ନେକ୍ ହେଲପଲାଇନ୍ ସଦସ୍ୟ ପହଞ୍ଚି ଏଟିଏମ୍ ଭିତରୁ ସାପକୁ ଉଦ୍ଧାର କରିବାରେ ସଫଳ ହୋଇଥିଲେ । ଉଦ୍ଧାର ହୋଇଥିବା ନାଗ ସାପର ଲମ୍ବ ପ୍ରାୟ ୫ଫୁଟ। ସାପକୁ ଉଦ୍ଧାର କରି ସ୍ନେକ୍ ହେଲପ ଲାଇନ୍ ସଦସ୍ୟ ନିକଟସ୍ଥ ଜଙ୍ଗଲରେ ଛାଡ଼ିଦେଇଛନ୍ତି।