https://youtu.be/SRsoOl38yuQ
ଭୁବନେଶ୍ୱର (ବଡ଼ ଖବର ବ୍ୟୁରୋ): ଚିଲିକାରେ ଫସିଲା ଡଙ୍ଗା । ଫସିଲେ କେନ୍ଦ୍ରମନ୍ତ୍ରୀ । ୫ ଘଣ୍ଟା ପରେ ନଳବଣ ପାଖରୁ ମିଳିଲା ସନ୍ଧାନ । ବାଲୁଗାଁ କାର୍ଯ୍ୟକ୍ରମ ସାରି ସାତପଡ଼ା ଫେରୁଥିଲେ କେନ୍ଦ୍ରମନ୍ତ୍ରୀ ତଥା ମତ୍ସ୍ୟସମ୍ପଦ ମନ୍ତ୍ରୀ ପୁରୁଷୋତ୍ତମ ରୁପାଲ । କେନ୍ଦ୍ରମନ୍ତ୍ରୀଙ୍କ ସହ ବିଜେପି ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର ଓ ଅନ୍ୟ ବରଷ୍ଠ ନେତାମାନେ ମଝି ଚିଲିକାରେ କିଛି ସମୟ ପାଇଁ ଫସି ରହିବା କାରଣରୁ ଏଭଳି ଖବର ଆସିଥିଲା। ବାଟ ନ ପାଇ ଏଣେତେଣେ ପଶିଯାଇଥିଲେ ଓ ଚିଲିକାରେ ପଡ଼ିଥିବା ଜାଲରେ ବୋଟ୍ ଛନ୍ଦି ହୋଇ ଅଟକି ଯାଇଥିଲା।
୫ ଘଣ୍ଟା ପରେ ନଳବଣ ଉତ୍ତର ପାର୍ଶ୍ବ ଡ୍ରୋଜର କୁଦା ନିକଟରୁ ତାଙ୍କୁ ଉଦ୍ଧାର କରାଯାଇ ରାତି ପ୍ରାୟ ସାଢ଼େ ୮ଟାରେ ସାତପଡ଼ା କୂଳକୁ ଅଣାଯାଇଥିଲା। ଖୋର୍ଦ୍ଧା ଜିଲ୍ଲା ବାଲୁଗାଁରୁ କାର୍ଯ୍ୟକ୍ରମ ସାରି ବୋଟ୍ରେ ଫେରିବା ବେଳେ ଏହି ଅଘଟଣ ଘଟିଛି। କେନ୍ଦ୍ରମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥା ନେଇ ଏହା ବଡ଼ ପ୍ରଶ୍ନ ଠିଆ କରିଛି। ମତ୍ସ୍ୟଜୀବୀଙ୍କ ପାଇଁ ‘ସାଗର ପରିକ୍ରମା’ର ଏକାଦଶ ପର୍ଯ୍ୟାୟ କାର୍ଯ୍ୟକ୍ରମ ଆରମ୍ଭ ହୋଇଛି। କେନ୍ଦ୍ରମନ୍ତ୍ରୀ ଶ୍ରୀ ରୁପାଲା ଏଥିରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।
ତେବେ ସେଠାକୁ ଯିବା ପାଇଁ କେନ୍ଦ୍ରମନ୍ତ୍ରୀଙ୍କ ପାଇଁ ଓଟିଡିସି ଓ ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ ପକ୍ଷରୁ ସ୍ପିଡ୍ ବୋଟ୍ର ବ୍ୟବସ୍ଥା କରାଯାଇଥିଲା। ସାଙ୍ଗରେ ଆଉ ଏକ ବୋଟ୍ ଓ ଡଙ୍ଗା ବି ରହିଥିଲା। କିନ୍ତୁ କେଇ ମିନିଟ୍ର ଯାତ୍ରା ପରେ କେନ୍ଦ୍ରମନ୍ତ୍ରୀଙ୍କ ବୋଟ୍ର କୌଣସି ସନ୍ଧାନ ମିଳିନଥିଲା। ସାତପଡ଼ା ଆସିବା ବଦଳରେ ଚାଳକ ଅନ୍ୟ ରୁଟ୍ରେ ବୋଟ୍ ନେଇ ପଳାଇଥିଲେ। ପହଞ୍ଚିବା ବିଳମ୍ବ ହେବାରୁ ଡଙ୍ଗାରେ ଥିବା ବିଜେପି ରାଷ୍ଟ୍ରୀୟ ପ୍ରବକ୍ତା ଶ୍ରୀ ପାତ୍ର ଓ ଅନ୍ୟମାନେ ଓଟିଡିସି, ସିଡିଏ ସହ ଦଳୀୟ ନେତା ଓ ଅନ୍ୟମାନଙ୍କୁ ଯୋଗାଯୋଗ କରିଥିଲେ। କିନ୍ତୁ ଚିଲିକା ମଝିରେ ଜିପିଏସ୍ ବ୍ୟବସ୍ଥା କାମ କରୁନଥିବାରୁ ସହଜରେ ବୋଟ୍କୁ ଠଉରାଇବା ସମ୍ଭବପର ନଥିଲା।
