ହାତୀର ମୃତଦେହ ଉଦ୍ଧାର

ଆଠମଲ୍ଲିକ, (ବଡ଼ ଖବର ବ୍ୟୁରୋ): ଅନୁଗୁଳ ଜିଲ୍ଲା ଅଠମଲ୍ଲିକ ରେଜଂରେ ହାତୀ ମଣିଷ ଲଢେଇ । କେତେବେଳେ ହାତୀ ମରୁଛି ତ କେତେବେଳେ ମଣିଷ । ଗତ ୨୦ତାରିଖରେ କମଳପୁର ଗ୍ରାମର ୫୫ ବର୍ଷୀୟ ବୃଦ୍ଧାଙ୍କୁ ହାତୀ ଦଳି ଦେଇଥିବା ବେଳେ ଗତକାଲି ବାମୁର ରେଜଂ କଦଳିମୁଣ୍ଡା ଗ୍ରାମ ନିକଟ ତେନ୍ତୁଳାନାଳର ଗୋଟିଏ ହାତୀଛୁଆର ମୃତଦେହ ଉଦ୍ଧାର କରାଯାଇଛି । ମୃତ ହାତୀର ବୟସ ଏଗାର ବର୍ଷ ହେବ ବୋଲି ଅନୁମାନ କରାଯାଉଛି । ନିଜ ପଲରୁ ଅଲଗା ହୋଇଥିବା ଏହି ହାତୀଟି ଏକୁଟିଆ ବୁଲୁଥିବାର ଦେଖିଥିଲେ ଗ୍ରାମବାସୀ । ତେବେ ଅସୁସ୍ଥତା କାରଣରୁ ହାତୀଛୁଆଟିର ମୃତ୍ୟୁ ହୋଇଥିବା କହିଛି ବନବିଭାଗ । ବ୍ୟବଚ୍ଛେଦ ରିପୋର୍ଟ ଅସିଲେ ହାତୀ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି କହିଛନ୍ତି ବାମୁର ରେଞ୍ଜର ।

ଗତ କିଛିଦିନ ହେବେ ଆଠମଲ୍ଲିକ ରେଜଂରେ ହାତୀ ଉପଦ୍ରବ ବଢିବାରେ ଲାଗିଛି । ୧୫ରୁ ୨୦ ହାତୀ ଅଞ୍ଚଳରେ ଆତଙ୍କ ଖେଳାଇ ଚାଲିଛନ୍ତି । ପ୍ରତିବର୍ଷ ଫସଲ ଅମଳ ସମୟରେ ହାତୀମାନେ ଗାଁ ମୁହାଁ ହେଉଛନ୍ତି । ଫଳରେ ଚାଷୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଫସଲ ନଷ୍ଟ ହେଉଥିବା ବେଳେ ବନବିଭାଗ ହାତୀ ପଲକୁ ଘଉଡେଇବା ପାଇଁ ଚେଷ୍ଟା କରୁନଥିବା ଅଭିଯୋଗ କରିଛନ୍ତି ଅଞ୍ଚଳବାସୀ । ସେମାନଙ୍କୁ କ୍ଷତିପୂରଣ ମଧ୍ୟ ଦିଆଯାଉନଥିବା ଅଭିଯୋଗ ହୋଇଛି ।