କୋଲକାତା (ବଡ଼ ଖବର ବ୍ୟୁରୋ): ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଆହତକୁ ନେଇ ବଡ଼ ବୟାନ ସାମ୍ନାକୁ ଆସିଛି । ତାଙ୍କୁ କେହି ପଛରୁ ଠେଲି ଦେଇଥିବା ଅଭିଯୋଗ ହୋଇଛି । କୋଲକାତା ପୋଲିସ କମିଶନରଙ୍କୁ କହିଛନ୍ତି ଯେ ତାଙ୍କୁ ବେଡରୁମରେ ପଛପଟୁ ଠେଲି ଦିଆଯାଇଥିଲା । ଯେଉଁଥିପାଇଁ ସେ ତଳେ ପଡ଼ିଯାଇ ତାଙ୍କ ମୁଣ୍ଡରେ ଆଘାତ ଲାଗିଥିଲା। ଏହା ବ୍ୟତୀତ ଏସଏସକେଏମ ହସ୍ପିଟାଲର ନିର୍ଦ୍ଦେଶକ ମଣିମୟ ବନ୍ଦୋପାଧ୍ୟାୟ ମଧ୍ୟ ଏକ ସାମ୍ବାଦିକ ସମ୍ମିଳନୀରେ ସମାନ ସୂଚନା ଦେଇଛନ୍ତି।
ଗତକାଲି ସନ୍ଧ୍ୟାରେ ମମତା ଘରେ ବୁଲୁଥିବା ବେଳେ ପଡିଯାଇ ଆହତ ହୋଇଥିବା କୁହାଯାଉଥିଲା । କିନ୍ତୁ ଏବେ ଘଟଣାକୁ ନେଇ ନୂଆ ତଥ୍ୟ ସାମ୍ନାକୁ ଆସିଛି । ଏହା ଦୁର୍ଘଟଣା ନା ଷଡଯନ୍ତ୍ର ତାକୁ ନେଇ ଦ୍ୱନ୍ଦ ଥିବା ବେଳେ ଡାକ୍ତରଙ୍କ ରିପୋର୍ଟକୁ ନେଇ ଚର୍ଚ୍ଚା ଆରମ୍ଭ ହୋଇଛି ।ବର୍ତ୍ତମାନ ଏହି ଘଟଣା ପୋଲିସ ମୁଖ୍ୟାଳୟ ଲାଲବାଜର ପକ୍ଷରୁ ଅନୁସନ୍ଧାନ କରାଯିବ।
ଅଧିକାରୀଙ୍କ ଟିମ ଶୁକ୍ରବାର ମୁଖ୍ୟମନ୍ତ୍ରୀଙ୍କ ଘରକୁ ଯାଞ୍ଚ ପାଇଁ ଯିବେ। ମୁଖ୍ୟମନ୍ତ୍ରୀଙ୍କୁ ଜେଡ ପ୍ଲସ ବର୍ଗର ସୁରକ୍ଷା ଯୋଗାଇ ଦିଆଯାଇଛି ଏବଂ ଏପରି ପରିସ୍ଥିତିରେ ତାଙ୍କୁ ଶୋଇବା ଘର ଭିତରୁ କିପରି ଠେଲି ଦିଆଯାଇଥିଲା ତାହା ଅନୁସନ୍ଧାନ କରାଯିବ। ମୁଖ୍ୟମନ୍ତ୍ରୀଙ୍କ ଶୟନ କକ୍ଷକୁ ପରିଦର୍ଶକଙ୍କ ତାଲିକା ପ୍ରସ୍ତୁତ କରାଯାଉଛି।
