ଆଜି ଆସିବ କଂଗ୍ରେସର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା!

ଭୁବନେଶ୍ୱର (ବଡ଼ ଖବର ବ୍ୟୁରୋ): ସରିଛି ମାନସମନ୍ଥନ । ଆଜି ଘୋଷଣା ହୋଇପାରେ କଂଗ୍ରେସ ଦଳର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା । ଦିଲ୍ଲୀରୁ ଫେରିବା ପରେ ପିସିସି ସଭାପତିଙ୍କ ସୂଚନା । ମୋଟ ୧୪୭ ବିଧାନସଭା ଏବଂ ୨୧ ଲୋକସଭା ଆସନ ପାଇଁ କେତେ ପର୍ଯ୍ୟାୟରେ ଟିକେଟ୍ ଘୋଷଣା ହେବ । ସେନେଇ କିଛି ସ୍ପଷ୍ଟ ସୂଚନା ମିଳିନାହିଁ । ହେଲେ ପ୍ରଥମ ପର୍ଯ୍ୟାୟରେ ୧୨ ଲୋକସଭା ଆସନ ଏବଂ ୫୨ ବିଧାୟକ ପ୍ରାର୍ଥୀଙ୍କ ନାଁ ଘୋଷଣା କରାଯାଇପାରେ ବୋଲି ସୂଚନା ମିଳିଛି ।

ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ଯେ, ସ୍କ୍ରିନିଂ କମିଟି ବୈଠକ ଶେଷ ପରେ କେନ୍ଦ୍ରୀୟ ନିର୍ବାଚନ କମିଟିର ବୈଠକ ସରିଛି । ଏହି ବୈଠକରେ ଓଡ଼ିଶାର ଅଧିକାଂଶ ଆସନ ନେଇ ତର୍ଜମା କରାଯାଇଛି । ଖୁବଶୀଘ୍ର ଆଗାମୀ ବିଧାନସଭା ଏବଂ ଲୋକସଭା ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିପାରେ ଦଳ । କେଉଁ କେଉଁ ଆସନରେ କିଏ କିଏ ଯୋଗ୍ୟ ପ୍ରାର୍ଥୀ ଅଛନ୍ତି । ସେନେଇ ତର୍କ ବିତର୍କ ହୋଇଛି । ଟିକେଟ ବଣ୍ଟନରେ ସବୁ ବର୍ଗର ଲୋକଙ୍କୁ ଗୁରୁତ୍ୱ ଦିଆଯିବ । ସେହିପରି ଦଳ ଛାଡୁଥିବା ନେତାଙ୍କ ସଂପର୍କରେ କହିଛନ୍ତି ଯେ, ନିର୍ବାଚନ ସମୟରେ ଏଭଳି ସ୍ଥିତି ଦେଖାଯାଏ । କେବଳ କଂଗ୍ରେସରେ ହେଉଛି ତାହା ନୁହେଁ, ସାରା ଦେଶରେ ଏମିତି ହେଉଛି । ବିଜେଡି ଓ ବିଜେପିର ଅନେକ ନେତା ଦଳ ଛାଡିଛନ୍ତି । ତେଣୁ ଏଥିରେ କିଛି ବ୍ୟସ୍ତ ହେବାର କିଛି ନାହିଁ ।