କେଜ୍ରିୱାଲଙ୍କ ବିରୋଧରେ କୋର୍ଟ ଗଲେ ଆପ୍ ନେତା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ):ବଢୁଛି ଅରବିନ୍ଦ କେଜ୍ରିଓ୍ୱାଲଙ୍କ ଅଡୁଆ । ଦିଲ୍ଲୀ ମୁଖ୍ୟମନ୍ତ୍ରୀଙ୍କ ବିରୋଧରେ କୋର୍ଟ ଗଲେ ଆପ୍ ନେତା । ଗିରଫ ହେବା ପରେ ମଧ୍ୟ ଅରବିନ୍ଦ କେଜ୍ରିଓ୍ୱାଲ ତାଙ୍କର ମୁଖ୍ୟମନ୍ତ୍ରୀ ପଦ ଛାଡିନାହାନ୍ତି ଯାହାକୁ ନେଇ ବର୍ତମାନ କନ୍ଦଳ ଦେଖାଗଲାଣି । ଗୋଟିଏ ପଟେ କେଜ୍ରିୱାଲ ଗିରଫ ଦାରିକୁ ନେଇ ଆପ୍ ଅନେକ ନେତା ଏହାକୁ ବିରୋଧ କରୁଛନ୍ତି । ଅନେପଟେ କଂଗ୍ରେସ ଏହାକୁ କଡା ସମାଲୋଚନା କରୁଛି । କିନ୍ତୁ କେଜ୍ରିୱାଲ ଜେଲରେ ରହି ସରକାର ଚଳାଇବାକୁ ବିରୋଧ କରିଛନ୍ତି ପୂର୍ବତନ ଆପ୍ ନେତା ତଥା ପୂର୍ବତନ ବିଧାୟକ ସନ୍ଦୀପ କୁମାର।
ଅରବିନ୍ଦ କେଜ୍ରିଓ୍ୱାଲ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦିଅନ୍ତୁ ବୋଲି ସେ ଦାବି କରିଛନ୍ତି । ତାଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇବା ପାଇଁ ସନ୍ଦୀପ ଦିଲ୍ଲୀ ହାଇକୋର୍ଟର ଦ୍ୱାରସ୍ଥ ହୋଇଛନ୍ତି । ମନି ଲଣ୍ଡରିଂ ମାମଲାରେ କେଜ୍ରିଓ୍ୱାଲ ଗିରଫ ହେବା ପରେ ମୁଖ୍ୟମନ୍ତ୍ରୀ ପଦରେ ରହିବାର ତାଙ୍କର କୌଣସି ଅଧିକାର ନାହିଁ । ମୁଖ୍ୟମନ୍ତ୍ରୀ ଜଣେ ଏଭଳି ବ୍ୟକ୍ତି ଯିଏକି ନିଜ ପଦ ସମ୍ଭାଳିବାରେ ଅସମର୍ଥ ଅଛନ୍ତି । ଦିଲ୍ଲୀ ବିଧାନସଭା ନିର୍ବାଚନର ଜଣେ ଭୋଟର ଭାବରେ ସେ ବ୍ୟକ୍ତିଗତ ରୂପେ ଏହାକୁ ନେଇ ବେଶ୍ ବ୍ୟଥିତ ଅଛନ୍ତି । ନ୍ୟାୟିକ ହେପାଜତରେ ରହି କେଜ୍ରିଓ୍ୱାଲ କେବେ ବି ମୁଖ୍ୟମନ୍ତ୍ରୀ ଭାବେ କାର୍ୟ୍ୟ କରିପାରିବେ ନାହିଁ । କେଜ୍ରିୱାଲ ସମ୍ବିଧାନ ଅନୁଯାୟୀ ଦିଲ୍ଲୀର ମୁଖ୍ୟମନ୍ତ୍ରୀ ଭାବରେ ତାଙ୍କର କାର୍ୟ୍ୟ ସମ୍ପାଦନ କରିବାରେ ଅସମର୍ଥ ଏବଂ ତେଣୁ ସେ ଏହି ପଦବୀରେ ରହିପାରିବେ ନାହିଁ ବୋଲି ସନ୍ଦୀପ କହିଛନ୍ତି। ସୋମବାର ହାଇକୋର୍ଟରେ ପୂର୍ବତନ ଆପ୍ ନେତାଙ୍କ ଏହି ଆବେଦନର ଶୁଣାଣି ହେବ
