୪୦୦୦ରୁ ଅଧିକ ସାଂସଦ…ପାଟିରୁ ଖସିଗଲା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ୨୫ ମିନିଟ୍ ଭାଷଣ ରଖିବା ପରେ ପ୍ରଧାନମନ୍ତ୍ରୀଙ୍କ ପାଦ ଛୁଇଁଥିଲେ ନୀତୀଶ କୁମାର । ବିହାର ନୱଡାର ଏକ ନିର୍ବାଚନୀ ସଭାରେ ଏନଡିଏ ନେତା ସାମିଲ ହୋଇଥିଲେ । ସଭାମଞ୍ଚରେ ଉଭୟ ମୋଦୀ ଏବଂ ନୀତୀଶ ଏକାଠି ପାଖାପାଖି ବସିଥିଲେ । ଏହି ସମୟରେ ଦୁଇ ନେତା କୌଣସି ପ୍ରସଙ୍ଗରେ କଥା ହେଉଥିବା ବେଳେ ନୀତୀଶ କୁମାର ମୋଦୀଙ୍କ ପାଦ ଛୁଇଁଥିବାର ଦେଖିବାକୁ ମିଳିଛି । ଯାହାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଚାଲିଛି । ନିକଟରେ ମହାମେଣ୍ଟ ସହ ସଂପର୍କ ତୁଟାଇ ନୀତୀଶ କୁମାର ଏନଡିଏକୁ ଫେରି ବିହାରରେ ସରକାର ଗଢିଛନ୍ତି ।
ତେବେ ଏହାକୁ ସମାଲୋଚନା କରିଛି ଆରଜେଡି । ସେହିପରି ନୀତୀଶ ତାଙ୍କ ଉଦ୍ବୋଧନରେ କହିଥିଲେ ଆମେ ପୂରା ଆଶାବାଦୀ ରହିଛୁ ଯେ ଏଥର ଏନ୍ଡିଏରେ ୪ ହଜାରରୁ ଅଧିକ ସାଂସଦ ଆସନ ହାସଲ କରିବ। ଆମେ ଜନସାଧାରଣଙ୍କୁ ଏହି ଅନୁରୋଧ କରବାକୁ ଆସିଛୁ। ୪ ହଜାରରୁ ଅଧିକ ସାଂସଦ ଏନ୍ଡିଏରୁ ନିର୍ବାଚିତ ହେବେ।’ ସୂଚନାଯୋଗ୍ୟ, ବିହାରରେ ୪୦ ଆସନ ରହିଥିବା ବେଳେ ପ୍ରଧାନମନ୍ତ୍ରୀ ଏଥର ‘୪୦୦ ପାର୍’ ଲକ୍ଷ୍ୟ ରଖିଛନ୍ତି। ନୀତୀଶଙ୍କ ପାଟିରୁ ୪୦୦ ବଦଳରେ ୪୦୦୦ ବୋଲି ଖସିଯିବା ପରେ ସଭାରେ ହାସ୍ୟରୋଳ ସୃଷ୍ଟି ହୋଇଥିଲା।