ମୁରିବାହାଲ, (ବଡ଼ ଖବର ବ୍ୟୁରୋ): ବଲାଙ୍ଗିର ଜିଲ୍ଲା ମୁରିବାହାଲ ବ୍ଲକ ପତ୍ରାପାଲି ପଞ୍ଚାୟତ ଲିମପରା ଗାଁର ଦିବ୍ୟାଙ୍ଗ ଯୁବକ ବିଦ୍ୟାଧର ସାହୁ। ବୟସ ପାଖାପାଖି ୨୫ ବର୍ଷ । ବିଦ୍ୟାଧର ଚାଲିବା ବୁଲିବା ଏପରି କି କିଛି କାମ କରିବାକୁ ସମ୍ପୂର୍ଣ୍ଣ ଅକ୍ଷମ। ତାଙ୍କୁ ପ୍ରଶାସନ ପକ୍ଷରୁ ୫୦ ପ୍ରତିଶତ ଭିନ୍ନକ୍ଷମ ପ୍ରମାଣପତ୍ର ପ୍ରଦାନ କରାଯାଇଛି । ଦିବ୍ୟାଙ୍ଗମାନଙ୍କ ପାଇଁ ସରକାରଙ୍କ ତରଫରୁ ଅନେକ ଯୋଜନା କରାଯାଇଛି । କିନ୍ତୁ ବିଦ୍ୟାଧରଙ୍କୁ କେବଳ ଦିବ୍ୟାଙ୍ଗ ଭତ୍ତାକୁ ବାଦ୍ ଦେଲେ ଆଉ କିଛି ସରକାରୀ ଯୋଜନା ତାଙ୍କ ପାଖରେ ପହଞ୍ଚି ପାରିନି ।
ବିଦ୍ୟାଧର ମା’, ବାପା ଓ ଭାଇଙ୍କ ସହ ଏକାଠି ଏକ ମାଟି ଘରେ ରହୁଛନ୍ତି । ଛାତ ଘର ନିର୍ମାଣ କରିବା ବିଦ୍ୟାଧରଙ୍କ ବାପା ଚିନ୍ତାମଣିଙ୍କ ପକ୍ଷେ ସମ୍ଭବ ହେଉନାହିଁ । ଏଣୁ ପରିବାରର ମୁଣ୍ଡ ଗୁଞ୍ଜିବା ପାଇଁ ସରକାରୀ ଯୋଜନାରେ ଏକ ଘର ତାଙ୍କ ପୁଅକୁ ଯୋଗାଇ ଦେବାକୁ ସେ ଅନୁରୋଧ କରିଛନ୍ତି। ଚିନ୍ତାମଣି ଆଜି ଦିବ୍ୟାଙ୍ଗ ପୁଅ ବିଦ୍ୟାଧରଙ୍କ ସହ ବ୍ଲକ କାର୍ଯ୍ୟାଳୟକୁ ଆସି ପ୍ରଶାସନକୁ ଏପରି ଗୁହାରି କରିଛନ୍ତି। ଏନେଇ ମୁରିବାହାଲ ବିଡିଓ ମନୋଜ ସତ୍ୟବାନ ମହାଜନଙ୍କୁ ଯୋଗାଯୋଗ କରିବାକୁ ଚେଷ୍ଟା କରାଯାଇଥିବା ବେଳେ ତାହା ସମ୍ଭବ ହୋଇନାହିଁ ।
