ଗାଡ଼ି ସହ ଶାଳକାଠ ଜବତ

କାମାକ୍ଷାନଗର (ବଡ଼ ଖବର ବ୍ୟୁରୋ): ଢେଙ୍କାନାଳ ଜିଲ୍ଲା କାମାକ୍ଷାନଗର ପୂର୍ବାଞ୍ଚଳ ରେଞ୍ଜ କଙ୍କଡ଼ାହାଡ଼ ଫରେଷ୍ଟ ସେକ୍ସନ ଅନ୍ତର୍ଗତ ଡଙ୍ଗାପାଳ ଗାଁ ନିକଟରୁ ଏକ ପିକଅପ ଭ୍ୟାନ ସହିତ ଲକ୍ଷାଧିକ ଟଙ୍କାର ଶାଳକାଠ ଜବତ ହୋଇଛି । ଏହି ଅସାଧୁ କାରବାରେ ସାମିଲ୍ ଥିବା ଅଭିଯୋଗରେ ଜଣକୁ ଗିରଫ କରିଛନ୍ତି ବନବିଭାଗ କର୍ମଚାରୀ । ଗିରଫ ଅଭିଯୁକ୍ତ ଜଣଙ୍କ କଙ୍କଡ଼ାହାଡ଼ ଥାନା ଶଶାପଶି ଗାଁର ପ୍ରଦୀପ କବି ।

ରେଞ୍ଜର ସତ୍ୟନାରାୟଣ ସାହୁଙ୍କ ନିର୍ଦ୍ଦେଶକ୍ରମେ ଆଜି ଭୋରରୁ କଙ୍କଡ଼ାହାଡ଼ ଫରେଷ୍ଟର ଅଜିତ କୁମାର ଦଳେଇ ଓ ବିରାଶାଳ ଫରେଷ୍ଟର ଉଦ୍ଧବ ବେହେରା ପାଟ୍ରୋଲିଂ କରୁଥିବା ସମୟରେ ଶାଳକାଠ ବୋଝେଇ ଏହି ପିକଅପ ଗାଡିକୁ ଜବତ କରିଥିଲେ । ବନ କର୍ମଚାରୀମାନେ ଗାଡ଼ି ଚାଳକଙ୍କୁ ଗିରଫ କରିଥିଲେ । ଓଆର ୦୬ ଏଫ ୮୦୭୪ ନମ୍ବର ପିକଅପ ଭ୍ୟାନଟି ଶଶାପଶି ଗାଁରୁ କାମାକ୍ଷାନଗର ଥାନା ବଡ଼ସୁଆଁଳ ଗାଁକୁ ଚୋରା କାଠ ଧରି ଯାଉଥିବା ଜଣାପଡିଛି । ଗିରଫ ଅଭିଯୁକ୍ତକୁ କୋଭିଡ ଟେଷ୍ଟ ପରେ କୋର୍ଟ ଚାଲାଣ କରାଯିବ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି ।