ପଡ଼ିଆ, (ବଡ଼ ଖବର ବ୍ୟୁରୋ): ମାଲକାନାଗିରି ଜିଲ୍ଲା ପଡିଆ ବ୍ଲକ ଶିମିଳିବାଞ୍ଛା ପଞ୍ଚାୟତ ଅନ୍ତର୍ଗତ ଏମ୍ ଭି ୬୦ ଗ୍ରାମରୁ ପିଡିଏସ୍ ଚାଉଳ ଚୋରା ଚାଲାଣ ହେଉଥିବା ବେଳେ ଏମ୍ ଭି ୧୧୬ ଗ୍ରାମବାସୀ ଗାଡିକୁ ଅଟକାଇଛନ୍ତି । ପରେ ଏହାକୁ ଯୋଗାଣ ବିଭାଗକୁ ହସ୍ତାନ୍ତର କରିଥିବା ଜଣାପଡିଛି। ଗତ ମଙ୍ଗଳବାର ଅପରାହ୍ନରେ ଏମଭି୬୦ର ଜଣେ ବ୍ୟକ୍ତି ଓଡି ୩୦ ୫୬୩୭ ନମ୍ବର ମିନି ଟ୍ରକରେ ପ୍ରାୟ ୧୩୦ ବସ୍ତା ଚାଉଳ ମାଲକାନଗିରି ଅଞ୍ଚଳକୁ ଚୋରା ଚାଲାଣ କରୁଥିଲେ। ଖବର ପାଇ ଏମ ଭି ୧୧୬ ଗ୍ରାମବାସୀ ଶିମିଳିବାଞ୍ଛା – ଉଣ୍ଡୁରୁକୋଣ୍ଡା ମୁଖ୍ୟ ରାସ୍ତାରେ ଏହି ମିନି ଟ୍ରକକୁ ଅଟକାଇ ଯୋଗାଣ ବିଭାଗକୁ ଖବର ଦେଇଥିଲେ । ସନ୍ଧ୍ୟାରେ ଯୋଗାଣ ବିଭାଗ ପକ୍ଷରୁ ଏକାଧିକ ଅଧିକାରୀ ଘଟଣାସ୍ଥଳରେ ପହଞ୍ଚିବା ପରେ ଗାଡ଼ିକୁ ଏମଭି ୬୨ ଗ୍ରାମକୁ ନିଆଯାଇ ଘଟଣାର ତଦନ୍ତ ଜାରି ରହିଛି।
ଦିନ ଦ୍ୱିପହରେ ଶହ ଶହ ବସ୍ତା ପିଡିଏସ୍ ଚାଉଳ କେଉଁଠାରୁ ଓ କିଭଳି ଚାଲାଣ ହେଉଥିଲା ସାଧାରଣାରେ ପ୍ରଶ୍ନବାଚୀ ସୃଷ୍ଟି କରିଛି । ଘଟଣାର ନିରପେକ୍ଷ ତଦନ୍ତ ସହ ଚାଲାଣକାରୀଙ୍କ ବିରୋଧରେ ଦୃଢ କାର୍ୟ୍ୟନୁଷ୍ଠାନ ଦାବି କରିଛନ୍ତି ଗ୍ରାମବାସୀ । ଶିମିଳିବାଞ୍ଛା ଅଞ୍ଚଳରୁ ଚାଉଳ ଚାଲାଣ ହୋଇଥିଲେ ମଧ୍ୟ ଏଥିରେ ପଞ୍ଚାୟତର କୌଣସି ସମ୍ପର୍କ ନାହିଁ । ସ୍ଥାନୀୟ ବ୍ୟବସାୟୀ ପଞ୍ଚାୟତ ବାହାରୁ ଚାଉଳ କିଣି ଚାଲାଣ କରୁଥିବା ପଞ୍ଚାୟତ ସମ୍ପ୍ରସାରଣ ଅଧିକାରୀ ଦୁର୍ଯ୍ୟୋଧନ ନାୟକ କହିଛନ୍ତି। ଅନ୍ୟପଟେ ପିଡିଏସ୍ ଚାଉଳକୁ ଅନେକ ସମୟରେ ବିଭାଗୀୟ ଅଧିକାରୀ ଓ ବ୍ୟବସାୟୀ ହଡପ କରୁଥିବା ଅଭିଯୋଗ ହୋଇଆସୁଛି ।
