ଭୁବନ (ବଡ଼ ଖବର ବ୍ୟୁରୋ): ଓଡ଼ିଶାରେ ସରିଲା ତୃତୀୟ ପର୍ଯ୍ୟାୟ ନିର୍ବାଚନ । କାମାକ୍ଷାନଗର ନିର୍ବାଚନମଣ୍ଡଳି ଭୁବନ ବ୍ଲକ ମହୁଲପାଳ ପଞ୍ଚାୟତର ୧୩୧ ନମ୍ବର ବୁଥରେ ଦେଖିବାକୁ ମିଳିଥିଲା ଅଭାବନୀୟ ଘଟଣା । ବୁଥରେ ଦିବ୍ୟାଙ୍ଗ ଓ ବରିଷ୍ଠ ନାଗରିକମାନଙ୍କ ମତଦାନ ପାତରଅନ୍ତରକୁ ନେଇ ଅଞ୍ଚଳବାସୀଙ୍କ କ୍ଷୋଭ ଦେଖିବାକୁ ମିଳିଥିଲା। ଅଞ୍ଚଳବାସୀ ପ୍ରିଜାଇଡିଙ୍ଗ ଅଫିସରଙ୍କୁ ବିରୋଧ କରିବାରୁ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଦେଖିବାକୁ ମିଳିଥିଲା । ଯାହାଫଳରେ ବୁଥ କବାଟ ବନ୍ଦ କରାଯାଇଥିଲା ।
ବୁଥ ଆଗରେ ସ୍ଥାନୀୟ ବାସିନ୍ଦା ପ୍ରିଜାଇଡିଂ ଅଫିସରଙ୍କୁ ଏଠାରୁ ସ୍ଥାନାନ୍ତର କରାଯିବା ଦାବିରେ ନାରାବାଜି ଚାଲିଥିଲା । ପରେ ଗଣ୍ଡଗୋଳ ଉଗ୍ର ରୂପର ନେଇଥିଲା । ଉଭୟ ମହିଳା ଓ ପୁରୁଷଙ୍କ ମଧ୍ୟରେ ମାରପିଟ ହୋଇଥିଲା । ଖବର ପାଇ ଭୁବନ ଥାନାଧିକାରୀଣୀ ମନସ୍ମିତା ମହାନ୍ତି ଘଟଣାସ୍ଥଳରେ ପହଞ୍ଚିବାର ଦେଖି ଗଣ୍ଡଗୋଳକାରୀ ଛତ୍ର ଭଙ୍ଗ ଦେଇଥିଲେ । ଥାନା ଅଧିକାରୀଣୀଙ୍କ ଉପସ୍ଥିତରେ ବୁଥ ଖୋଲାଯାଇ ପୁନର୍ବାର ଦୁଇ ଘଣ୍ଟା ପରେ ମତଦାନ ଶାନ୍ତି ଶୃଙ୍ଖଳାର ସହିତ ଆରମ୍ଭ ହୋଇଥିଲା ।
