ଭୁବନେଶ୍ୱର (ବଡ଼ ଖବର ବ୍ୟୁରୋ): କ୍ଷମତା ବଳରେ ଧରାକୁ ସରା ମନେ କରୁଥିଲେ । କେତେ ଅନ୍ୟାୟ କରିଛନ୍ତି । ମହାପ୍ରଭୁଙ୍କ ପାଇଁ ସ୍ୱର ଉଠାଇବାରୁ ରାଜ୍ୟର ଜଣେ ବରିଷ୍ଠ ସାମ୍ବାଦିକ ତଥା ‘ବଡ଼ ଖବର’ ଟିଭି ଚ୍ୟାନେଲର ସମ୍ପାଦକ ଅର୍ଦ୍ଧେନ୍ଦୁ ଦାସଙ୍କୁ ମିଛ ମାମଲା ଲଗାଇ ଗିରଫ କରିଥିଲେ । ଟିଭି ଚ୍ୟାନେଲ୍କୁ ବନ୍ଦ କରିଦେଇଥିଲେ । ଏଭଳି ଓଡ଼ିଶା ଇତିହାସରେ କେବେ ହୋଇନଥିଲା । କେବଳ ଅର୍ଦ୍ଧେନ୍ଦୁ ନୁହେଁ ଦୁର୍ନୀତି ବିରୋଧରେ ଲଢ଼ୁଥିବା ପ୍ରଦୀପ ପ୍ରଧାନ, ପ୍ରକାଶ, ରାଜେଶ ପଟ୍ଟନାୟକଙ୍କ ଭଳି ଅନେକ ଲୋକଙ୍କୁ ଅନ୍ୟାୟପୂର୍ଣ୍ଣ ଭାବେ ଗିରଫ କରିଥିଲେ । ଯିଏବି ତାଙ୍କ ଭୁଲ୍କୁ ଧରୁଥିଲା ତା’ ମୁହଁ ବନ୍ଦ କରିଦେଉଥିଲେ । କେତେ ଅଧର୍ମ କରିଛନ୍ତି । ଏବେ ସେସବୁ ବିଚାର କରିଛନ୍ତି ମହାପ୍ରଭୁ । ଚକା ଆଖି ସବୁ ଦେଖୁଥିଲା । ଅନ୍ୟାୟର ବି ସୀମା ଥାଏ । ସବୁ ସୀମା ଟପି ଯାଇଥିଲେ ନବୀନ ପଟ୍ଟନାୟକ, ଭିକେ ପାଣ୍ଡିଆନ, ପ୍ରଣବ ପ୍ରକାଶ ଦାସ, ଡିଏସ୍ କୁଟ୍ଟେ ଓ ମୁଖ୍ୟ ଖଳନାୟକ ମାନସ ମଙ୍ଗରାଜ ।
ସେମାନଙ୍କ କର୍ମଫଳ ଭୋଗିବା ଆରମ୍ଭ ହୋଇଛି । ମହାପ୍ରଭୁ ସବୁ ହିସାବ କରୁଛନ୍ତି । ସତ୍ପଥରେ ଥିବା ଲୋକଙ୍କ ଆଖିରୁ ସେମାନେ ଯେଉଁ ଲୁହ ଗଡ଼ାଇଛନ୍ତି ଏହି ଜନ୍ମରେ ଭୋଗିକି ଯିବେ । ୨୦୨୨ ମସିହାରେ ତାହା ବି ଥିଲା ଜୁନ୍ ମାସ । ରଥଯାତ୍ରା ଆସିବାକୁ ଥାଏ । ପରିକ୍ରମା ପ୍ରକଳ୍ପ ନାଁରେ ଯେଉଁ ଦୁର୍ନୀତି ହୋଇଥିଲା ତା’ର ଖୁଲାସା କରୁଥାଏ ‘ବଡ଼ ଖବର’ । ଅର୍ଦ୍ଧେନ୍ଦୁଙ୍କ ମୁହଁ ବନ୍ଦ କରିବାକୁ ତାଙ୍କ ଭଳି ଜଣେ ସଚ୍ଚୋଟ ସାମ୍ବାଦିକଙ୍କୁ ଅର୍ଥ ଦେଇ ନକିଣି ପାରିବାରୁ ଇଓଡବ୍ଲୁ୍ୟ ଲଗାଇ ଗିରଫ କରିନେଇଥିଲେ । ସେମାନେ ଭୁଲିଗଲେ ଏ ସମୟର ଚକ ଘୂରୁଛି । କର୍ମଫଳର ହିସାବ ହୁଏ । ଅଧର୍ମର ଘଡ଼ା ପୂରିଗଲେ କେଡ଼େ କେଡ଼େ ମହାରଥୀ ଗଡ଼ି ପଡ଼ିଛନ୍ତି । ସେଠି ଏ ପାଣ୍ଡିଆନ୍, କୁଟ୍ଟେ, ମଙ୍ଗରାଜଙ୍କୁ ପଚାରେ କିଏ? ଏ ଜାତିର ଠାକୁର ସବୁ ସହେ । ହେଲେ ଅନୀତି, ଅହଙ୍କାର ନୁହେଁ । ସବୁ କାଳିଆ ଠାକୁରଙ୍କ ଇଚ୍ଛା । ସେ ସବୁ ବିଚାର କରିଛନ୍ତି । ଆଗକୁ ଆହୁରି କରିବେ ।
