ନାହିଁ ନାହିଁରେ ଚାଲିଛି ଅଙ୍ଗନୱାଡି କେନ୍ଦ୍ର ଶିକ୍ଷା, କ୍ଲବ ଘରେ ଚାଲିଛି ପାଠପଢା

ସାହାରାପଡ଼ା (ବଡ଼ ଖବର ବ୍ୟୁରୋ): ସରକାର କୁନି କୁନି ପିଲାମାନଙ୍କ ପାଇଁ ଅଙ୍ଗନୱାଡି କେନ୍ଦ୍ର ଖୋଲିଛନ୍ତି ସତ। ହେଲେ ଏହାର ବ୍ୟତିକ୍ରମ ଦେଖିବାକୁ ମିଳିଛି କେନ୍ଦୁଝର ଜିଲ୍ଲାର ସାହାରପଡା ବ୍ଳକର ଦମାହୁଦା ପଞ୍ଚାୟତର ଘୋଳକୁଣ୍ଡ ଗାଁର ମାନଚୁଡିଆ ସାହିରେ । ଏ ହେଉଛି କେନ୍ଦୁଝର ଜିଲ୍ଲାର ଦୃଶ୍ୟ । ସ୍ଥାୟୀ ପକ୍କା ଘର ଖଣ୍ଡେ ନଥିବାରୁ କ୍ଲବ ଘରେ ଚାଲିଛି ଅଙ୍ଗନୱାଡି କେନ୍ଦ୍ର । ଛୋଟ ଛୋଟ ପିଲାମାନେ ଏହି କ୍ଲବ ଘରେ ପାଠ ପଢୁଥିବା ଦେଖିବାକୁ ମିଳିଛି।

ଅଙ୍ଗନୱାଡି କେନ୍ଦ୍ର ପାଇଁ ବାରମ୍ବାର ପ୍ରଶାସନକୁ ଅଙ୍ଗନୱାଡି କର୍ମୀ ଦାବି କରି ଆସୁଥିଲେ ମଧ୍ୟ ଏହାର କୌଣସି ସୁଫଳ ମିଳିନାହିଁ। ସେପଟେ ଏନେଇ ସାହାରପଡା ସିଡିପିଓ ଦିପ୍ତିମୟୀ ନାୟକଙ୍କୁ ପଚାରିବାରୁ ସେ କହିଛନ୍ତି ଏ ବାବଦରେ ମୁଁ ସାହାରପଡା ବିଡ଼ିଓଙ୍କୁ ଜଣାଇଛି। ହେଲେ ଏହାର କୌଣସି ପ୍ରତିକାର କରାଯାଇନି ବୋଲି କହିଛନ୍ତି। ଫଳରେ ବହୁ ଅସୁବିଧାରେ କୁନି କୁନି ପିଲା ପାଠ ପଢୁଥିବା ବେଳେ ଅସନ୍ତୋଷ ବଢୁଛି ।