କଳଙ୍କିତ ଅଧ୍ୟାୟ ସୃଷ୍ଟି କରୁଛି ବିଜେଡି: ବାବୁ ସିଂ

ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟପାଳଙ୍କ ଅଭିଭାଷଣର ଧନ୍ୟବାଦ ପ୍ରସ୍ତାବକୁ ବଏକଟ କରି କଳଙ୍କିତ ଅଧ୍ୟାୟ ସୃଷ୍ଟି କରୁଛି ବିଜେଡି । ସେମାନେ ବିରୋଧୀ ଆସନରେ ଥିବାରୁ ସହଜରେ ହଜମ କରି ପାରୁ ନାହାନ୍ତି ବୋଲି କହିଛନ୍ତି ବିଜେପି ବିଧାୟକ ବାବୁ ସିଂ । ସେ କହିଛନ୍ତି ୨୪ ବର୍ଷ ସରକାରରେ ଥିଲେ, ସେହି ହାଙ୍ଗଓଭରରୁ ବାହାରି ପାରୁ ନାହାନ୍ତି । ପ୍ରମୁଖ ବିରୋଧୀ ବିଜେଡି ଆଲୋଚନା ଚାହୁଁ ନାହିଁ । ୮୦ ରୁ ଅଧିକ ନୂଆ ବିଧାୟକ ଆସିଛନ୍ତି ।

ସେମାନେ ବିକାଶ ଚାହୁଁଛନ୍ତି । ହେଲେ ବିରୋଧୀ ପ୍ରଥମ ଦିନରୁ ହିଁ ଗୃହ ବନ୍ଦ କରାଇ ନୂଆ ବିଧାୟକମାନଙ୍କ ସ୍ୱପ୍ନକୁ ଧୂଳିସାତ କରୁଛି । ରାଜ୍ୟପାଳଙ୍କ ପୁଅ ପ୍ରସଙ୍ଗରେ ଆଇନ ମନ୍ତ୍ରୀ କହି ସାରିଛନ୍ତି । ସେ ଆହୁରି ମଧ୍ୟ କହିଛନ୍ତି ଗୃହରେ ବିରୋଧୀ ଆଲୋଚନାକୁ ଆସିଲେ ନିର୍ଯ୍ୟାସ ବାହାରିବ । କଂଗ୍ରେସ କେନ୍ଦ୍ରରେ କ୍ଷମତା ଥିବା ସମୟରେ ଓଡ଼ିଶାକୁ କିଛି ଦେଲନି ।

ଓଡ଼ିଶା ମାଗିବାରୁ, ତାଙ୍କ ପ୍ରଧାନମନ୍ତ୍ରୀ କହିଥିଲେ ଯେ ଟଙ୍କା କଣ ଗଛରେ ଫଳୁଛି । ଏ କଥା ସେମାନେ ଭୁଲିବା କଥା ନୁହେଁ । କଂଗ୍ରେସ ଓଡ଼ିଆ ଅସ୍ମିତା କଥା କହିଲା ଯେ ରାଜ୍ୟପାଳ କାହିଁକି ହିନ୍ଦୀରେ ଅଭିଭାଷଣ ଦେଲେ । ତାଙ୍କୁ ତ କାହିଁକି ବାଧୁନି ଯେ ବିରୋଧୀ ଦଳ ନେତା ଇଂରାଜୀରେ କହିଲେ । ହିନ୍ଦୀ ଆମ ରାଷ୍ଟ୍ରୀୟ ଭାଷା । ଏବେ କଂଗ୍ରେସ ବିଜେଡି ସହ ଜଏଣ୍ଟ ଭେନଚରରେ ଅଛନ୍ତି ବୋଲି କହିଛନ୍ତି ବାବୁ ସିଂ ।