‘ଆମେ ଗତ ସରକାର ଭଳି ଠକ ନୁହଁ’

ଭୁବନେଶ୍ୱର (ବଡ଼ ଖବର ବ୍ୟୁରୋ): ପୁଣି ବିଜେଡିକୁ ଟାର୍ଗେଟ କଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ପୂର୍ବ ସରକାର ଉପରେ ବର୍ଷିଲେ ମୁଖ୍ୟମନ୍ତ୍ରୀ । ସେ କହିଛନ୍ତି ଆମେ ଗତ ସରକାର ଭଳି ଠକ ନୁହଁ। ସଶକ୍ତୀକରଣ ନାଁରେ ମହିଳାଙ୍କୁ ଠକିଥିଲେ, ବୋନସ୍ ଦେବେ କହି ଚାଷୀଙ୍କୁ ଠକିଥିଲେ, ଚାକିରି ଦେବା ନାଁରେ ଯୁବକଯୁବତୀଙ୍କୁ ଠକିଥିଲେ ପୂର୍ବ ସରକାର । ରାଜ୍ୟସ୍ତରୀୟ ସୁଶାସନ ଦିବସ ପାଳନ ଅବସରରେ, ଗତ ବିଜେଡି ସରକାରକୁ ଏଭଳି ଢଙ୍ଗରେ ନିଶାନା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ।

ସେ କହିଛନ୍ତି, ଗତ ୨୪ ବର୍ଷର ଶାସନ ଭିତରେ ଆମେ ବିକାଶର ଚିହ୍ନ ଦେଖିପାରିଲୁ ନାହିଁ । ୨୪ ବର୍ଷରେ ବେକାରୀ ବଢ଼ିଛି, ଅନେକ ଗାଁକୁ ବିକାଶ ଛୁଇଁନି। ପ୍ରାଥମିକ ଶିକ୍ଷା ଭୁଶୁଡ଼ି ପଡ଼ିଛି, ବହୁ ସ୍କୁଲରେ ଶିକ୍ଷକ ନାହାନ୍ତି। ୨୪ ବର୍ଷ ସରକାରରେ ଲୋକ କିଛି ଲାଭ ପାଇଲେ ନାହିଁ। ପୂର୍ବରୁ ମୁଁ ଅନେକ ଥର ଦରଖାସ୍ତ ନେଇ ଯାଇଛି। ତୃତୀୟ ମହଲାରେ ଥିବା ବାବୁମାନଙ୍କୁ ଦରଖାସ୍ତ ଦେଲେ ପଛରେ ଥିବା ଡ଼ଷ୍ଟବିନରେ ଫୋପାଡ଼ି ଦିଅନ୍ତି। ଆମ କାମ ହୋଇପାରେ ନାହିଁ। ହେଲେ ଏବେ ବ୍ୟବସ୍ଥା ବଦଳିଛି। ମୁଖ୍ୟମନ୍ତ୍ରୀ ନିଜେ ଲୋକଙ୍କ ଦୁଃଖ ବୁଝୁଛନ୍ତି। ଖୁବଶୀଘ୍ର ଓଡ଼ିଶା ଅର୍ଥନୈତିକ କ୍ଷେତ୍ରରେ ଦେଶର ଶ୍ରେଷ୍ଠ ୫ ରାଜ୍ୟ ଭିତରେ ରହିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।