କେତେ ଆଉ ଯନ୍ତ୍ରଣା ସହିବେ ଇରମା

ପଡ଼ିଆ (ବଡ଼ ଖବର ବ୍ୟୁରୋ): ମାଲକାନଗିରି ଜିଲ୍ଲା ପଡ଼ିଆ ବ୍ଲକ ଉଣ୍ଡୁରୁକୋଣ୍ଡା ପଞ୍ଚାୟତର ପାଡଗାନପଲ୍ଲୀର ଇରମା ମାଡ଼କାମି । କିଛିବର୍ଷ ହେବ ସେ ଯନ୍ତ୍ରଣାରେ ଛଟପଟ ହେଉଛନ୍ତି । ଆଉ ସହି ପାରୁନାହାନ୍ତି ଯନ୍ତ୍ରଣା । ଅନାଇ ରହିଛନ୍ତି ସରକାରୀ କିମ୍ବା ସେରକାରୀ ସହାୟତାକୁ ।
ଇରମା କିଛିବର୍ଷ ତଳେ ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଇଥିଲେ । ସେଠାରେ ସେ ଦୁର୍ଘଟଣାର ସମ୍ମୁଖୀନ ହୋଇଥିଲେ। ଏହି ଦୁର୍ଘଟଣା ଥିଲା ଅତି ଭୟଙ୍କର । ସବୁଦିନ ପାଇଁ ସେ ଏକ ଅଙ୍ଗକୁ ହରାଇ ବସିଲେ। ମୂତ୍ରାଶୟ ଭିତରର ଏକ ଅଂଶ ନଷ୍ଟ ହେଇଯାଇଥିଲା। ସେ ଅସ୍ତ୍ରୋପଚାର କରାଇଥିଲେ । କିନ୍ତୁ ଅର୍ଥ ଅଭାବରୁ ପରବର୍ତ୍ତି ଚିକିତ୍ସା ହୋଇପାରି ନ ଥିଲା । ତେଣୁ ସେ ବାଧ୍ୟ ହୋଇ ଘରକୁ ଫେରି ଆସିଥିଲେ। ୪ବର୍ଷ ଧରି ଅର୍ଥ ଅଭାବରୁ ସେ ଯନ୍ତ୍ରଣା ଭୋଗୁଛନ୍ତି । ସରକାରୀ ସହାୟତାକୁ ଚାହିଁ ବସିଛନ୍ତି । ସରକାରୀ ବାବୁ ଆସିବେ ଓ ସାହାଯ୍ୟ କରିବେ ସେହି ଆଶାରେ ଦିନ କାଟୁଛନ୍ତି ଇରମାଙ୍କ ପରିବାର। ଘରେ ଖାଇବା ପାଇଁ ନା ଅଛି ଦାନା ନା ଅଛି ଲୁଣ କିଣିବା ପାଇଁ ସମ୍ବଳ । ନିଜ ଅକ୍ଷମତା ଯୋଗୁ ୩ ଛୁଆ ଓ ସ୍ତ୍ରୀଙ୍କ କାନ୍ଧରେ ସେ ଝୁଲିଛନ୍ତି । ସେମାନେ ହିଁ ତାଙ୍କର ସାହା ଭରସା । ଇରମାର ପରିବାରକୁ ଆର୍ଥିକ ସହାୟତା ଯୋଗାଇ ଦେବା ପାଇଁ ଗାଁ ଲୋକେ ଓ ସରପଞ୍ଚ ପ୍ରଶାସନ ପାଖରେ ନିବେଦନ କରିଛନ୍ତି।