ଏକାଠି ଜଳିଲା ତିନି ଭାଇଙ୍କ ଜୁଇ

ନବରଙ୍ଗପୁର (ବଡ଼ ଖବର ବ୍ୟୁରୋ):ହୃଦୟ ବିଦାରକ ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଝରିଗାଁରେ । ଏକା ସାଙ୍ଗରେ ମଶାଣିରେ ଜଳିଲା ତିନି ତିନୋଟି ଜୁଇ । ହସ ଖୁସିରେ ଘରୁ ଗଡିଥିଲା ଗାଡି । କିଏ ଜାଣିଥିଲା କାଳ ସାଜିବ ଗୁରୁବାର । ବର୍ଷାର କୋହଲିଆ ସନ୍ଧ୍ୟାରେ ଗୀତରେ ମଜି ଯାଇଥିଲେ ତିନି ଭାଇ । ହେଲେ ନିମିଷକେ ସବୁକିଛି ଛାର୍ଖାର ।

ନବରଙ୍ଗପୁର ଜିଲ୍ଲା ଝରିଗାଁର ସଦର ସିରାଗୁଡା ସାହିର ସାଗର ଜୈନ, ଅଙ୍କୁର ଜୈନ, ଏବଂ ସମ୍ପର୍କିୟ ଭାଇ କ୍ରିସ ଜୈନ ତିନି ଭାଇଙ୍କର ଏକ କାର ଦୁର୍ଘଟଣାରେ ମୃତ୍ୟୁ ଘଟିଛି । କୌଣସି ଏକ କାମ ପାଇଁ ଗୁରୁବାର ସନ୍ଧ୍ୟାରେ କାର ଯୋଗେ ପୁଫୁଗାଁ ଯାଉଥିଲେ । ବାଟରେ କାରଟି ଭାରସାମ୍ୟ ହରାଇ ଏକ ଗଛରେ ପିଟି ହୋଇଥିଲା । ଫଳରେ ଗାଡିରେ ଯାଉଥିବା ତିନି ଜଣଙ୍କ ମଧ୍ୟରୁ ଦୁଇଜଣଙ୍କର ଘଟଣା ସ୍ଥଳିରେ ମୃତ୍ୟୁ ଘଟିଥିଲା । ଏବଂ ଅନ୍ୟ ଜଣଙ୍କ ଅବସ୍ଥା ଗୁରୁତ୍ୱପୂର୍ଣ ଥିଲା ।

ଗୁରୁତ୍ୱର ଜଣକ ଥିଲେ କ୍ରିସ୍ ଜୈନ । ତାଙ୍କୁ ବିଶଖାପାଟଣା ମେଡିକାଲକୁ ଚିକିତ୍ସା ପାଇଁ ନେବା ବାଟରେ ସାଲୁରଘାଟି ନିକଟରେ ମୃତ୍ୟୁ ଘଟିଥିଲା । ମୃତ ତିନି ଭାଇଙ୍କର ବୟଷ ୧୯ ରୁ ୨୨ ଭିତରେ ହେବ । ଭେଣ୍ଡିଆ ପୁଅମାନଙ୍କୁ ହରାଇ ଭାଙ୍ଗି ପଡିଛନ୍ତି ପରିବାର ।