ଭଦ୍ରକ (ବଡ଼ ଖବର ବ୍ୟୁରୋ): ବହୁ ଦିନର ଲକଡାଉନ-ସଟଡାଉନ ପରେ ଜୀବନଜୀବିକା ସ୍ୱାଭାବିକ ହେବାରେ ଲାଗିଛି । ଦୋହଲି ଯାଇଛି ଲୋକଙ୍କ ଆର୍ଥିକ ସ୍ଥିତି । ଧୀରେ ଧୀରେ ସମସ୍ତେ କର୍ମକ୍ଷେତ୍ରକୁ ଅଗ୍ରସର ହେଲେଣି । ହେଲେ ସରକାରଙ୍କ କରୋନା କଟକଣା ଶ୍ରମିକଙ୍କଠୁ ଆରମ୍ଭକରି ଛୋଟ ବ୍ୟବସାୟୀଙ୍କ ଜୀବିକା ପ୍ରତି ପ୍ରତିବନ୍ଧକ ସାଜିଛି । ଦଶହରାରେ ଭଲ ବ୍ୟବସାୟ ହେବା ନେଇ ବ୍ୟବସାୟୀମାନେ ଆଶାବାଦୀ ଥିଲେ, କିନ୍ତୁ ସବୁ ଚୁରମାର ହୋଇଯାଇଥିଲା । ଦୀପାବଳିରେ ଭଲ ବ୍ୟବସାୟ ହେବାନେଇ ପ୍ରସ୍ତୁତି ଆରମ୍ଭ କରିଥିଲେ ବ୍ୟବସାୟୀ । କିନ୍ତୁ କରୋନା କଟକଣା ସବୁ ଓଲଟ ପାଲଟ କରିଦେଇଛି ।
ସରକାରଙ୍କ କରୋନା କଟକଣା ଯୋଗୁଁ କିଛିମାସ ହେବ ବେଶ୍ ପ୍ରଭାବିତ ହୋଇଛନ୍ତି ଦୀପ ବ୍ୟବସାୟୀ । ସାମାଜିକ ଦୂରତା ଆଦି ଆଇନକୁ ନେଇ ବ୍ୟବସାୟୀମାନେ କ୍ଷତିଗ୍ରସ୍ତ ହୋଇଛନ୍ତି । ସାମାଜିକ ଦୂରତା ଉଲ୍ଲଙ୍ଘନ ନାଁରେ ଦୋକାନ ସିଲଠାରୁ ଆରମ୍ଭ କରି ମୋଟା ଅଙ୍କର ଜରିମାନା ଦୀପ ବ୍ୟବସାୟୀଙ୍କ ଚିନ୍ତା ବଢ଼଼ାଇ ଦେଇଛି । ବ୍ୟବସାୟ କ୍ଷତିରେ ଚାଲୁଥିବା ବେଳେ ପ୍ରଶାସନର କଠୋର କଟକଣା ବୋଝ ଉପରେ ଲଳିତା ବିଡ଼ା ସଦୃଶ ହୋଇପଡ଼ିଛି ।
ଭଦ୍ରକ ଅଞ୍ଚଳର କୁମ୍ଭାର ପରିବାର ଦୀପାବଳିରେ ଦୀପ ତିଆରି କରି ରାଜ୍ୟର ବିଭିନ୍ନ ସ୍ଥାନରେ ବିକ୍ରି କରିଥାନ୍ତି । ମୁଖ୍ୟତଃ ରାଜଧାନୀ ଭୁବନେଶ୍ୱରେ ଦୀପ ବିକ୍ରିକରି ଦୁଇ ପଇସା ରୋଜଗାର କରିଥାନ୍ତି । ବର୍ଷକରେ ଥରେ ଆସୁଥିବା ଦୀପାବଳି ହିଁ ତାଙ୍କ ପାଇଁ ବ୍ୟବସାୟର ଉକ୍ରୃଷ୍ଟ ସମୟ ହୋଇଥାଏ । ଭୁବନେଶ୍ୱରରେ ରାସ୍ତାକଡରେ ଦୀପ ବିକ୍ରି ନେଇ ବିଏମସ ି(ଭୁବନେଶ୍ୱର ମହାନଗର ନିଗମ) ପକ୍ଷରୁ କଟକଣା ଲଗାଯାଇଛି । ରାସ୍ତାକଡ ଦୀପବିକ୍ରି ଉପରେ କଟକଣା ଲାଗିବା ଫଳରେ କୁମ୍ଭକାର ପରିବାରଙ୍କ ଚିନ୍ତା ବଢି଼ଯାଇଛି ।
