ସ୍ୱାମୀର ଶବକୁ ଜଗିଛନ୍ତି ସ୍ତ୍ରୀ-ପୁଅ
ବିନିକା (ବଡ଼ ଖବର ବ୍ୟୁରୋ): ପାରିବାରିକ କଳହ ପାଇଁ ଶବ ଗ୍ରହଣ କରିଲେନି ପରିବାର । ବିନିକା ଥାନାରେ ଦୀର୍ଘ ୮ ଘଣ୍ଟା ଧରି ପଡ଼ିରହିଛି ମୃତଦେହ । ଶବ ଜଗି ରହିଛନ୍ତି ମୃତକଙ୍କ ସ୍ତ୍ରୀ ଏବଂ ୭ ବର୍ଷୟ ପୁଅ । ସୁବର୍ଣ୍ଣପୁର ଜିଲ୍ଲା ବିନିକା ଥାନା ବରପଦର ଗାଁରେ ଏଭଳି ଘଟଣା ଘଟିଛି । ନ୍ୟାୟ ପାଇଁ ସ୍ତ୍ରୀ ଓ ପୁଅ ଶବ ରଖି ନ୍ୟାୟ ମାଗୁଛନ୍ତି ।
ପ୍ରମୋଦ ବାଗଙ୍କ ଦେହ ଅସୁସ୍ଥ ହେବାରୁ ସ୍ୱାମୀକୁ ଭଲ କରିବା ପାଇଁ ସ୍ତ୍ରୀ ଜନନୀ ବାଗ ପ୍ରଥମେ କୁଚିଣ୍ଡା ମେଡିକାଲ ଓ ପରେ ବୁର୍ଲା ବୀର ସୁରେନ୍ଦ୍ର ସାଏ ବଡ଼ ମେଡିକାଲରେ ଭର୍ତ୍ତି କରିଥିଲେ । ହେଲେ ସେଠାରେ ତାଙ୍କ ମୃତ୍ୟୁ ଘଟିଛି । କିନ୍ତୁ ମହାପ୍ରୟାଣ ଗାଡ଼ିରେ ସ୍ୱାମୀର ଶବକୁ ବରପଦର ଗାଁକୁ ଶବ ସତ୍କାର ପାଇଁ ନେଇଥିଲେ ବି ପରିବାର ଲୋକେ ଶବକୁ ଗ୍ରହଣ କରିନଥିଲେ । ଫଳରେ ନ୍ୟାୟ ଦାବିରେ ଶବକୁ ବିନିକା ଥାନାକୁ ଆଣିଛନ୍ତି ପ୍ରମୋଦଙ୍କ ସ୍ତ୍ରୀ ଜନନୀ । ବର୍ତମାନ ଥାନାରେ ମହାପ୍ରୟାଣ ଗାଡି ଭିତରେ ଶବ ପଡ଼ିଥିବା ବେଳେ ସ୍ତ୍ରୀ ଓ ୭ ବର୍ଷର ପୁଅ ଜଗିଛନ୍ତି ।