ପାଣି ଉଠାଇବା ବେଳେ ଅଘଟଣ, ପୁଅକୁ ଉଦ୍ଧାର କରିବାକୁ ଯାଇ ବୁଡିଗଲେ ବାପା

ଜଗତସିଂହପୁର (ବଡ଼ ଖବର ବ୍ୟୁରୋ): ବୋଲବମ୍ ପାଇଁ ପାଣି ଉଠାଇବା ବେଳେ ଅଘଟଣ। ପାଣି ଉଠାଉଥିବା ବେଳେ ବୁଡିଗଲା ପୁଅ। ଉଦ୍ଧାର କରିବାକୁ ଯାଇ ମହାନଦୀରେ ବୁଡି ବାପାର ମୃତ୍ୟୁ । ମୃତ ବ୍ୟକ୍ତି ହେଲେ ପାରାଦୀପ ଲକ ଥାନା ନିମିଢିହି ଗ୍ରାମର ଇଶ୍ଵର ବାରିକ। ଗୁରୁତର ପୁଅକୁ କୁଜଙ୍ଗ ମେଡିକାଲ ସ୍ଥାନାନ୍ତର କରାଯାଇଥିବା ବେଳେ ଏବେ ସିଏ ସୁସ୍ଥ ଅଛି । ଏଭଳି ଏକ ଅଭାବନୀୟ ଘଟଣା ଘଟିଛି ଭୂତୁମୁଣ୍ଡାଇ ପୋଲ ନିକଟ ମହାନଦୀରେ । ଆଜି ନିମିଢିହି ଗ୍ରାମର ଇଶ୍ଵର ବାରିକ ତାଙ୍କ ପୁଅକୁ ଧରି ବୋଲବମ୍ ପାଣି ଉଠାଇବାକୁ ଆସିଥିଲେ।

ପୁଅ ଛୋଟ ଥିବାରୁ ସାଙ୍ଗରେ ଧରି ଆସିଥିଲେ ଇଶ୍ଵର। ପାଣି ଆଣି ପୂଜା କରିବା ସମୟରେ ପାଣି ଢାଳ ଭାସି ଯିବାରୁ ପୁଅ ଢାଳ ଆଣିବା ପାଇଁ ଯାଇ ଭାସି ଯାଇଥିଲେ। ତାଙ୍କୁ ଉଦ୍ଧାର କରିବାପାଇଁ ଇଶ୍ଵର ନଦୀକୁ ଡେଇଁ ପଡି ପୁଅକୁ ଉଦ୍ଧାର କରିଥିଲେ ମଧ୍ୟ ନିଜେ ଭାସି ଯାଇଥିଲେ। ଘଟଣାସ୍ଥଳରେ ପାରାଦୀପ ଲକ ଥାନା ଓ ଅଗ୍ନିଶମ ବିଭାଗ ପହଞ୍ଚି ଖୋଜାଖୋଜି କରିବାରେ ଇଶ୍ଵରଙ୍କ ମୃତଦେହ ଉଦ୍ଧାର କରାଯାଇଛି। କୁଜଙ୍ଗ ତହସିଲଦାର ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟର ତଦାରଖ କରିଥିଲେ। ତେବେ ପ୍ରଶାସନ ପକ୍ଷରୁ ପାଣି ଉଠାଇବା ପାଇଁ କରାଯାଇଥିବା ଘାଟ ବଦଳରେ ସେମାନେ ଅନ୍ୟ ସ୍ଥାନରୁ ପାଣି ଉଠାଉଥିବା ତହସିଲଦାର କହିଛନ୍ତି।