ସ୍ୱାଧୀନତା ଦିବସରେ ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା, OCS ନିୟମରେ ପରିବର୍ତ୍ତନ
ଭୁବନେଶ୍ୱର (ବଡ଼ ଖବର ବ୍ୟୁରୋ): ସ୍ୱାଧୀନତା ଦିବସ ଅବସରରେ ରାଜ୍ୟର ଯୁବପିଢ଼ିଙ୍କ ପାଇଁ ବଡ଼ ଘୋଷଣା । ଓଡ଼ିଶା ସିଭିଲ୍ ସର୍ଭିସ୍ (OCS ) ପରୀକ୍ଷାରେ ଆବେଦନ କରିବାକୁ ନେଇ ରହିଥିବା ସୁଯୋଗ ସଂଖ୍ୟାରେ କୋହଳ କରାଯିବ । ବର୍ତ୍ତମାନ OCS ପରୀକ୍ଷା ପାଇଁ ଥିବା ସର୍ବାଧିକ ୬ଟି ସୁଯୋଗ ବ୍ୟବସ୍ଥାକୁ ଉଠାଇ ଦିଆଯିବ। ଫଳରେ ଆଶାୟୀମାନେ ନିର୍ଦ୍ଧାରିତ ବୟସସୀମା ମଧ୍ୟରେ ଥିବା ପର୍ୟ୍ୟନ୍ତ OCS ପରୀକ୍ଷା ଦେବାର ସୁଯୋଗ ପାଇପାରିବେ। ଏହି ନିଷ୍ପତ୍ତି ଚାକିରି ଆଶାୟୀଙ୍କ ପାଇଁ ବଡ଼ ଆଶ୍ୱସ୍ତି ଆଣିଛି।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶନିବାର ଦିନ ୮୦ତମ ସ୍ବାଧୀନତା ଦିବସ ଅବସରରେ ଏହି ଘୋଷଣା କରିଛନ୍ତି। ଗାନ୍ଧୀ ମାର୍ଗରେ ଆୟୋଜିତ ରାଜ୍ୟସ୍ତରୀୟ ସ୍ୱାଧୀନତା ଦିବସ ସମାରୋହରେ ରାଜ୍ୟବାସୀଙ୍କୁ ଉଦ୍ବୋଧନ ଦେଇ ମୁଖ୍ୟମନ୍ତ୍ରୀ କହିଛନ୍ତି, OCS ପରୀକ୍ଷା ପାଇଁ ଥିବା ସର୍ବାଧିକ ୬ ଥର ପରୀକ୍ଷା ଦେବାର ନିୟମକୁ ହଟାଯିବ। ଫଳରେ ଯୋଗ୍ୟ ପ୍ରାର୍ଥୀମାନେ ବୟସସୀମା ମଧ୍ୟରେ ରହିଥିଲେ ଅଧିକ ଥର ପରୀକ୍ଷା ଦେଇପାରିବେ। ମୁଖ୍ୟମନ୍ତ୍ରୀ କହିଛନ୍ତି, ଚାକିରି ପାଇଁ ସର୍ବାଧିକ ବୟସସୀମାକୁ ୪୨ ବର୍ଷକୁ ବୃଦ୍ଧି କରାଯାଇଛି।
ସରକାରଙ୍କ ଏହି ପଦକ୍ଷେପ ଫଳରେ ପରୀକ୍ଷାରେ ଅଧିକ ଥର ଭାଗ ନେବାର ସୁଯୋଗ ମିଳିବା ସହ ଯୁବପିଢ଼ିଙ୍କୁ ସିଭିଲ୍ ସର୍ଭିସ୍ରେ ପ୍ରବେଶ ପାଇଁ ଅଧିକ ସୁଯୋଗ ମିଳିବ। ସ୍ୱାଧୀନତା ଦିବସରେ ମୁଖ୍ୟମନ୍ତ୍ରୀଙ୍କ ଏହି ଘୋଷଣାକୁ ନେଇ ଚାକିରି ଆଶାୟୀଙ୍କ ମଧ୍ୟରେ ଉତ୍ସାହ ବଢ଼ିଛି।