ଭୁବନେଶ୍ୱର (ବଡ଼ ଖବର ବ୍ୟୁରୋ): ବରିଷ୍ଠ କଂଗ୍ରେସ ନେତା ତଥା ସାଂସଦ ଅହମଦ ପଟେଲଙ୍କ ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ ହୋଇଛି। ଗତ ୧ ତାରିଖରେ ତାଙ୍କ କୋଭିଡ୍ ଟେଷ୍ଟ ରିପୋର୍ଟ ପଜିଟିଭ୍ ଆସିଥିଲା। ପରେ ତାଙ୍କୁ ଗୁରୁଗ୍ରାମସ୍ଥିତ ମେଦାନ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏବେ ସେ ମେଦାନ୍ତ ହସ୍ପିଟାଲ ଆଇସିୟୁରେ ଚିକିତ୍ସାଧୀନ ଅଛନ୍ତି। କରୋନା ଭାଇରସ ଦ୍ୱାରା ତାଙ୍କ ଫୁସଫୁସ ସମେତ ଶରୀରର ଅନ୍ୟ ଗୁରୁତ୍ୱପୂର୍ଣ୍ଣ ଆଭ୍ୟନ୍ତ୍ରରୀଣ ଅଙ୍ଗପ୍ରତ୍ୟଙ୍ଗ ନଷ୍ଟ ହୋଇଯାଇଛି। ସୂଚନାଯୋଗ୍ୟ, ପଟେଲ ୧୯୪୯ ଅଗଷ୍ଟ ୨୧ରେ ଜନ୍ମଗ୍ରହଣ କରିଥିଲେ। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ରାଜନୈତିକ ପରାମର୍ଶଦାତା ଭାବେ ସେ ବେଶ୍ ଜଣାଶୁଣା। ଗୁଜରାଟରୁ ସମୁଦାୟ ୮ ଥର ସେ ସଂସଦକୁ ନିର୍ବାଚିତ ହୋଇଛନ୍ତି। ତିନିଥର ଲୋକସଭାକୁ ଏବଂ ପାଞ୍ଚଥର ରାଜ୍ୟସଭାକୁ ନିର୍ବାଚିତ ହୋଇଛନ୍ତି। ୧୯୭୬ରେ ପଟେଲ ପ୍ରଥମ କରି ରାଜନୀତିକୁ ଓହ୍ଲାଇଥିଲେ। ଗୁଜରାଟର ଭରୁଚ ଜିଲ୍ଲାରୁ ସେ କଂଗ୍ରେସ ପ୍ରାର୍ଥୀ ଭାବେ ଲୋକାଲ ବଡି ଇଲେକ୍ସନ ଲଢ଼ିଥିଲେ। ପରବର୍ତ୍ତୀ ସମୟରେ ସେ ଦଳର ରାଜ୍ୟ ଏବଂ କେନ୍ଦ୍ର ଶାଖାରେ ନିଜ ପତିଆରା ଜମାଇଥିଲେ। ୧୯୮୫ରେ ତତ୍କାଳୀନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସଂସଦୀୟ ସଚିବ ଭାବେ କାର୍ଯ୍ୟ କରିଥିଲେ।
