ସରକାରୀ ନିଷ୍ପତ୍ତିକୁ ବିରୋଧ

ନାକଟିଦେଉଳ(ବଡ଼ ଖବର ବ୍ୟୁରୋ):ସମ୍ବଲପୁର ଜିଲ୍ଲା ନାକଟିଦେଉଳ ବ୍ଳକ ବାଟଗାଁ ପଞ୍ଚାୟତର ବକ୍ସିବଜାର ସାହିର ଗ୍ରାମବାସୀ ଓ ଛାତ୍ରଛାତ୍ରୀ ସରକାରଙ୍କ ସ୍କୁଲ ମିଶ୍ରଣ ନିଷ୍ପତ୍ତିକୁ ବିରୋଧ କରିଛନ୍ତି । ଗ୍ରାମବାସୀଙ୍କ ଅଭିଯୋଗ ଅନୁସାରେ ବକ୍ସିବଜାର ପ୍ରାଥମିକ ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ପର୍ୟ୍ୟନ୍ତ ସମୁଦାୟ ୨୨ଜଣ ଛାତ୍ରଛାତ୍ରୀ ପାଠପଢୁଛନ୍ତି । କିନ୍ତୁ ସରକାର ଏବେ ଏହି ସ୍କୁଲକୁ ଉଠାଇ ନେଇ ଦୁଇ କି.ମି ଦୂର କୁଞାମୁରା ପ୍ରାଥମିକ ବିଦ୍ୟାଳୟ ସହ ମିଶ୍ରଣ କରିଛନ୍ତି । ଗ୍ରାମର କୋମଳମତି ଛାତ୍ରଛାତ୍ରୀମାନେ ନିକଟସ୍ଥ କୁଞାମୁରା ସ୍କୁଲକୁ ଯିବାକୁ ହେଲେ ଜାତୀୟ ରାଜପଥରେ ଅଥବା ଖାଲଖମା ରାସ୍ତାରେ ଯିବାକୁ ହେବ । ଯାହାକି ସେମାନଙ୍କ ପାଇଁ ନିରାପଦ ନୁହେଁ ।ଏସଂପର୍କରେ ଗ୍ରାମର ଜନସାଧାରଣ ବ୍ଲକ ଶିକ୍ଷା ଅଧିକାରୀ ,ବିଡିଓ ଏବଂ ଜିଲ୍ଳାପାଳଙ୍କୁ ଜଣାଇ ସ୍କୁଲ ନଉଠାଇବାକୁ ଦାବିପତ୍ର ପ୍ରଦାନ କରିଥିଲେ । ମାତ୍ର କୌଣସି ପଦକ୍ଷେପ ଗ୍ରହଣ କରାଯାଇ ନଥିବାରୁ ଗ୍ରାମବାସୀ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି କହିଛନ୍ତି । ଦାବି ପୂରଣ ପର୍ୟ୍ୟନ୍ତ ସ୍କୁଲରେ ତାଲା ଝୁଲି ରହିବ ବୋଲି ବିଦ୍ୟାଳୟ ପରିଚାଳନା କମିଟି ଚେତାବନୀ ଦେଇଛି ।