ହାଣ୍ଡିମାଠିଆ ଧରି ରାସ୍ତାରୋକ କଲେ ମହିଳା
ସୋରଡା (ବଡ଼ ଖବର ବ୍ୟୁରୋ): ଅସହ୍ୟ ଖରା ଯୋଗୁଁ ପାଣି ପାଇଁ ଡହଳ ବିକଳ ଲୋକେ । ହାଣ୍ଡିମାଠିଆ ଧରି ରାସ୍ତାରୋକ କଲେ ଗ୍ରାମର ମହିଳା । । ଏଭଳି ଦୃଶ୍ୟ ଦେଖିବାକୁ ମିଳିଛି ଭଞ୍ଜନଗର ବଡକୋଦାଣ୍ଡ ଗ୍ରାମରେ ଶିବ ମନ୍ଦିର ସାହିରେ । ଅସହ୍ୟ ଖରା ଯୋଗୁଁ ଗ୍ରାମରେ ଜଳ ସଙ୍କଟ ଦେଖିବାକୁ ମିଳିଛି । କିଏ ନଦୀରୁ ପାଣି ଆଣି ବ୍ୟବହାର କରୁଥିବା ବେଳେ ଆଉ କିଛି ଗ୍ରାମର ଲୋକେ ନଳକୂଅ ଉପରେ ଭରସା କରୁଛନ୍ତି । ଭଞ୍ଜନଗର ନିକଟସ୍ଥ ବଡକୋଦଣ୍ଡା ଗ୍ରାମର ଶିବମନ୍ଦିର ସାହିରେ ଦୀର୍ଘ ପନ୍ଦର ଦିନ ହେବ ଘରକୁ ସଂଯୋଗ କରାଯାଇଥିବା ବସୁଧା ଯୋଜନାରେ ପାଣି ଆସୁନଥିବାରୁ ଗ୍ରାମ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି ।
ଏହାକୁ ନେଇ ସରପଞ୍ଚକୁ ଏକ ଲିଖିତ ଅଭିଯୋଗ ଦେଇଥିଲେ ମଧ୍ୟ କୌଣସି ସମାଧାନ ନହେବାରୁ ଆଜି ସକାଳେ ଗ୍ରାମର ମହିଳାମାନେ ହାଣ୍ଡି ମାଠିଆ ଧରି ରାସ୍ତା ଅବରୋଧ କରିଥିଲେ । ଖବର ପାଇ ଭଞ୍ଜନଗର ପୋଲିସ, ଜଳାଯୋଗଣ କନିଷ୍ଠ ଯନ୍ତ୍ରୀ ଓ ସମିତି ସଭ୍ୟ ପହଞ୍ଚି ମହିଳାମାନଙ୍କୁ ବୁଝାସୁଝା କରିବା ସହିତ ଆଜି ସନ୍ଧ୍ୟା ସୁଦ୍ଧା ବସୁଧା ଯୋଜନାରେ ପାଣି ଘରକୁ ପହଂଚାଇବା ପାଇଁ ପ୍ରତିଶ୍ରୁତି ଦେଇଥିଲେ ।