ଆଜି ଭାରତ ବନ୍ଦ
ଭୁବନେଶ୍ୱର (ବଡ଼ ଖବର ବ୍ୟୁରୋ) : କେନ୍ଦ୍ର ସରକାରଙ୍କ ନୂତନ କୃଷି ବିଲକୁ ବିରୋଧ କରି ଆଜି ଦେଶ ବ୍ୟାପୀ ଭାରତ ବନ୍ଦ ଡାକରା ଦିଆଯାଇଛି । କେନ୍ଦ୍ରର କୃଷି ଆଇନକୁ ବିରୋଧ କରି ଭାରତ ବନ୍ଦ ଡାକରା ଦେଇଛି କୃଷକ ସଙ୍ଗଠନ । ଓଡ଼ିଶାରେ ମଧ୍ୟ ଏହାର ପ୍ରଭାବ ଆଜି ଦେଖିବାକୁ ମିଳିଛି । ରାଜ୍ୟର ବିଭିନ୍ନ ଜିଲ୍ଲା ମାନଙ୍କରେ ଏଥିପାଇଁ ଆନ୍ଦୋଳନ ଆରମ୍ଭ ହୋଇଗଲାଣି । ଭାରତ ବନ୍ଦକୁ ଏଥର ପୂର୍ଣ୍ଣ ସମର୍ଥନ କରିଛି ଓଡ଼ିଶା କଂଗ୍ରେସ । ମାଲକାନଗିରି ଜିଲ୍ଲାରେ ସି.ପି.ଏମ ,କଂଗ୍ରେସ ଓ ଆଦିବାସୀ ମହାସଂଘ ପକ୍ଷରୁ ରାସ୍ତା ରୋକ କରାଯାଇଛି । ବିଭିନ୍ନ ସ୍ଥାନରେ ଦଳିୟ କର୍ମୀ ଓ ଆଦିବାସୀ ଆନ୍ଦୋଳନ କରିବା ସହ ରାସ୍ତା ରୋକ କରିଛନ୍ତି । କୃଷି ବିଲ ପ୍ରତ୍ୟାହାର କରିବା ସହ ପେଟ୍ରୋଲ ଡିଜେଲର ଦର ମଧ୍ୟ ହ୍ରାସ କରିବା ଲାଗି ଦାବି ହୋଇଛି ।
ପିପିଲି କଂଗ୍ରେସ ନେତା ଅଜିତ ମଙ୍ଗରାଜଙ୍କ ନେତୃତ୍ୱରେ ପୁରୀ ଜାତୀୟ ରାଜପଥର ସାତଶଙ୍ଖ ଠାରେ ରାଜରାସ୍ତାରେ ଟାୟାର ଜାଳି ରାସ୍ତା ଅବରୋଧ କରାଯାଇଛି ।
ସେହିପରି ସୁବର୍ଣ୍ଣପୁର ଜିଲ୍ଲାର ସମସ୍ତ ୬ଟି ବ୍ଲକରେ ଆନ୍ଦୋଳନକାରୀଙ୍କ ପିକେଟିଂ ହେତୁ ରାସ୍ତା ଘାଟରେ ଗାଡି ଚଳାଚଳ ସଂପୂର୍ଣ୍ଣ ବନ୍ଦ ରହିଛି । ରାଜ୍ୟ ସରକାରଙ୍କ ନିଷ୍ପତ୍ତି ଅନୁଯାୟୀ ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିବା ସହ ଦୋକାନ ବଜାର ଖୋଲିବାକୁ ବାରଣ କରାଯାଇଛି ।