ଜ୍ୱରରେ କମ୍ପିବେ ଜଗତନାଥ

ପୁରୀ (ବଡ଼ ଖବର ବ୍ୟୁରୋ): ମହାପ୍ରଭୁଙ୍କ ସ୍ନାନଯାତ୍ରା । ଜଗତ ଦେଖିଲା ଜଗାର ଗାଧୁଆ । ୧୦୮ ଗରା ଜଳରେ ଗାଧୋଇଲେ ଚତୁର୍ଦ୍ଧାମୂରତି । କାଳିଆ ସାଆନ୍ତଙ୍କ ଗାଧୁଆ ଦେଖି ତୃପ୍ତ ହେଲା ଦୁଇ ଆଖି । ଭକ୍ତ ଭଗବାନଙ୍କ ହେଲା ଅପୂର୍ବ ମିଳନ । ଆଖିରେ ଆଖି ଦିଆ ନିଆ ହେଲା ମନ । ସେ ପରା ଚକା ନୟନ । ଚକା ଆଖିରେ କୋଟି ଭକତର ବୁଝି ନେଲା ମନ । ଖାଲି ଭକ୍ତ କାହିଁକି ଆକଶରୁ କୋଟି ଦେବତାଙ୍କ ଚକ୍ଷୁ ହେଲା ଧନ୍ୟ । ସ୍ନାନବେଦିରେ ୧୦୮ ଗରା ସୁବାସିତ ଜଳରେ ମହାସ୍ନାନ କଲେ ମହାବାହୁ । ବଡ ଠାକୁର ବଳଭଦ୍ର ୩୩ ଗରା ଜଳରେ ଗାଧୋଇ ଥିବା ବେଳେ ୨୨ଗରା ଜଳରେ ମାଆ ସୁଭଦ୍ରାଙ୍କ ପାଖରେ ଲାଗି ହୋଇଛି । ପ୍ରଭୁ ଜଗନ୍ନାଥଙ୍କ ପାଖରେ ୩୫ ଗରା ଜଳ ଲାଗି ହୋଇଥିବା ବେଳେ, ୧୮ଗରା ସୁଦର୍ଶନଙ୍କ ପାଖରେ ଜଳଲାଗି କରାଯାଇଛି । ସୁନା କୂଅ ଜଳ ଆଉ ସେହି ଜଳରେ ଜାଇ ଫଳ, କସ୍ତୁରୀ, କେଶର, କର୍ପୁର, ଚନ୍ଦନ, ଘୃତ ଆଦି ମିଶ୍ରିତ ସୁବାସିତ ଜଳରେ ତିନି ଠାକୁର ମହାସ୍ନାନ କରିଛନ୍ତି । ଚର୍ତୁଦ୍ଧାମୂର୍ତ୍ତିଙ୍କୁ ଦର୍ଶନ କରିବା ପାଇଁ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଛି । ଜୟ ଜଗନ୍ନାଥ ଧ୍ୱନିରେ କମ୍ପୁଛି ବଡ ଦାଣ୍ଡ । ବିଶ୍ୱାସ ରହିଛି, ସ୍ନାନ ପୂର୍ଣ୍ଣିମାରେ ସ୍ନାନ ବେଦୀରେ ମହାପ୍ରଭୁଙ୍କ ଦର୍ଶନ କଲେ ଜୀବନର ସମସ୍ତ ପାପ କ୍ଷୟ ହୁଏ ଏବଂ ପ୍ରଭୁଙ୍କ ଅପାର କୃପା ଲାଭ ହୁଏ । ସମସ୍ତ ନୀତିକାନ୍ତି ସମାପ୍ତ ହେବା ପରେ ମହାପ୍ରଭୁ ଚତୁର୍ଦ୍ଧାମୂରତି ହାତୀ ବେଶରେ ଦିବ୍ୟ ଦର୍ଶନ ଦେବେ । ପରେ ପରମ୍ପରା ଅନୁଯାୟୀ ଜ୍ୱରରେ କମ୍ପିବେ ମହାବାହୁ । ଅଣସର ଘରେ ନେବେ ବିଶ୍ରାମ । ପଥି ଓ ଚେରମୂଳିରେ ମହାପ୍ରଭୁଙ୍କ ହେବ ଉପଚାର । ଏହି ସମୟରେ ମହାପ୍ରଭୁଙ୍କ ସର୍ବ ସାଧାରଣ ଦର୍ଶନ ବନ୍ଦ ରହିବ । ଅଣସର ପରେ ନବଯୌବନ ବେଶରେ ଦର୍ଶନ ଦେବେ ମଣିମା । ଆରମ୍ଭ ହୋଇଯିବ ନବଦିନାତ୍ମକ ଯାତ୍ରା ବା ରଥଯାତ୍ରା ।