ପାଠ ପାଇଁ ବୟସ ବାଧକ ନୁହଁ

ଢେଙ୍କାନାଳ(ବଡ଼ ଖବର ବ୍ୟୁରୋ): ଦୃଢ଼ ଇଚ୍ଛାଶକ୍ତି ଆଗରେ ହାରମାନିଛି ବୟସ । ଏହାର ଜ୍ୱଳନ୍ତ ଉଦାହରଣ ହେଉଛନ୍ତି ଢେଙ୍କାନାଳ ଜିଲ୍ଲା ସୋଗରପଶି ଅନ୍ତର୍ଗତ ପାରିଖେଦା ଗ୍ରାମର ତ୍ରିଲୋଚନ ନାଏକ । ଯେ ୪୨ ଥରରେ ମାଟ୍ରିକ ଓ ୧୦ ଥର ପରୀକ୍ଷା ଦେବାପରେ ଯୁକ୍ତ ଦୁଇ ପାସ କରିଥିଲେ । ଏବେ ତ୍ରିଲୋଚନକୁ ୬୫ ବର୍ଷ ବୟସ । ଅବସର ନେବାର ଏହି ବୟସରେ ସେ ପାସ୍ କରିଛନ୍ତି ଓକିଲାତି। ଏଲଏଲବି ପରୀକ୍ଷା ଦେଇ କୃତିତ୍ୱ ହାସଲ କରିଛନ୍ତି ସେ ।

ଏହି ସ୍ଥାନରେ ପହଞ୍ଚିବା ପାଇଁ ତାଙ୍କୁ ସାହି ପଡିଶା ଓ ସାଙ୍ଗସାଥୀଙ୍କ କେତେ ଯେ ଟାହି ଟାପରା ଶୁଣିବାକୁ ପଡ଼ିଛି। ତଥାପି ଶେଷକୁ ନିନ୍ଦା ଅପବାଦ ତାଙ୍କୁ ପଛକୁ ଫେରାଇ ପାରିନାହିଁ । ବରଂ ଆଗକୁ ଯିବାର ଖୋରାକ ଯୋଗାଇଛି । ଆଜିର ଯୁବପିଢୀ କୌଣସି ପରୀକ୍ଷାରେ ଗୋଟେ ଦୁଇ ଥର ଅକୃତକାର୍ଯ୍ୟ ହେବାପରେ ନିରାଶ ହୋଇପଡୁଛନ୍ତି। ହେଲେ ତ୍ରିଲୋଚନ ଆଜିର ଯୁବ ସମାଜ ପାଇଁ ଉଦାହରଣ ହୋଇ ରହିବେ ।