ଅନ୍ନପୂର୍ଣ୍ଣା ଯୋଜନା: ୧ ଟଙ୍କାରେ ମିଳିବ ଖାଦ୍ୟ
ଭୁବନେଶ୍ୱର (ବଡ଼ ଖବର): ରାଜଧାନୀର ବିଭିନ୍ନ ରାସ୍ତା କଡରେ ଭୋକିଲା ଲୋକଙ୍କୁ ମାଗଣା ରନ୍ଧା ଖାଦ୍ୟ ଯୋଗାଇବା ପାଇଁ ଜାନୁଆରି ୮ରେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଅନ୍ନପୂର୍ଣ୍ଣା ଟ୍ରଷ୍ଟକୁ ଲୋକାର୍ପିତ କରିଥିଲେ । ଅନ୍ନପୂର୍ଣ୍ଣା ଯୋଜନାରେ ମାଗଣାରେ ନୁହେଁ ବରଂ ଖାଦ୍ୟ ଖାଇବା ପାଇଁ ୧ ଟଙ୍କା ଦେବାକୁ ହେବ ବୋଲି ଘୋଷଣା କରିଛନ୍ତି ଅପରାଜିତା ଷଡ଼ଙ୍ଗୀ । ବିଏମସିର ନୂଆ ବିଜ୍ଞପ୍ତି ଅନୁଯାୟୀ, ରାସ୍ତାକଡ ଲୋକଙ୍କୁ ଖାଦ୍ୟ କିମ୍ବା ଅନ୍ୟାନ୍ୟ ସାମଗ୍ରୀ ନ ବାଣ୍ଟି ବିଏମସି ଦ୍ୱାରା ପରିଚାଳିତ ହେଉଥିବା ଆଶ୍ରୟସ୍ଥଳରେ ବାଣ୍ଟନ୍ତୁ ।
ବିଏମସିର ଅନୁମତି ନେଇ ଖାଦ୍ୟ, ବସ୍ତ୍ର ଓ ଅନ୍ୟାନ୍ୟ ସାମଗ୍ରୀ ବାଣ୍ଟିପାରିବେ ବୋଲି କୁହାଯାଇଛି । ବିଏମସିର ବିନା ଅନୁମତିରେ ଖାଦ୍ୟ, ବସ୍ତ୍ର ବାଣ୍ଟିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଧ୍ୟ କୁହାଯାଇଛି । ରାଜଧାନୀକୁ ଭିକାରିମୁକ୍ତ କରିବାକୁ ଯୋଜନା ଆରମ୍ଭ କରିଛି ବିଏମସି । ରାସ୍ତାକଡ ଲୋକଙ୍କୁ ବିଭିନ୍ନ ଅନୁଷ୍ଠାନ ପକ୍ଷରୁ ଖାଦ୍ୟ ଓ ଅନ୍ୟାନ୍ୟ ସାମଗ୍ରୀ ବଣ୍ଟନ କରାଯାଉଥିବାରୁ ସେମାନେ ବିଏମସି ପରିଚାଳିତ ଆଶ୍ରୟସ୍ଥଳକୁ ଯାଉ ନଥିବା ଦେଖିବାକୁ ମିଳୁଛି । ତେଣୁ ସେମାନଙ୍କ ମାନସିକତାରେ ପରିବର୍ତ୍ତନ ଆଣିବା ପାଇଁ କଡା କଟକଣା ଲଗାଇଛି ବିଏମସି ।