ପୁଣି ଜଣେ କାଶ୍ମୀର ପଣ୍ଡିତଙ୍କୁ ଗୁଳି କରି ହତ୍ୟା

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଜାମ୍ମୁ-କାଶ୍ମୀରରେ ଆତଙ୍କ ରାଜ୍ । ପୁଣି ଜଣେ କାଶ୍ମୀର ପଣ୍ଡିତଙ୍କୁ ଗୁଳି କରି ହତ୍ୟା କରାଯାଇଛି । ଆତଙ୍କବାଦୀମାନେ ପୁଣି ଥରେ କାଶ୍ମୀରର ପୁଲୱାମାକୁ ଟାର୍ଗେଟ କରିଛନ୍ତି। ମୃତ ପଣ୍ଡିତ ହେଲେ ସଞ୍ଜୟ ଶର୍ମା । ତାଙ୍କ ଉପରକୁ ଗୁଳି ଚଳାଇ ଆତଙ୍କବାଦୀମାନେ ସେଠାରୁ ଫେରାର ହୋଇଯାଇଥିଲେ । ସଞ୍ଜୟ ଶର୍ମାଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଥିଲା, ସେଠାରେ ତାଙ୍କର ମୃତ୍ୟୁ ହୋଇଛି । ସୂଚନାନୁସାରେ, ପୁଲୱାମାର ଆଚାନ ଅଞ୍ଚଳର ବାସିନ୍ଦା ସଞ୍ଜୟ ଶର୍ମା କୌଣସି କାମ ପାଇଁ ରବିବାର ବଜାରକୁ ଯାଇଥିଲେ। ଏହି ସମୟରେ ଆତଙ୍କବାଦୀମାନେ ସେମାନଙ୍କ ଉପରେ ଆକ୍ରମଣ କରିଥିଲେ।

ସଞ୍ଜୟ ଶର୍ମାଙ୍କ ମୃତ୍ୟୁ ପରେ ପୋଲିସ ଏବଂ ସୁରକ୍ଷା ବାହିନୀ ସ୍ଥାନୀୟ ଅଞ୍ଚଳକୁ ଘେରି ରହିଛନ୍ତି। ଆତଙ୍କବାଦୀଙ୍କୁ ଖୋଜିବାକୁ ସର୍ଚ୍ଚ ଅପରେସନ୍ ଜାରି ରହିଛି । ଏହାପୂର୍ବରୁ ଶୁକ୍ରବାର ରାତିରେ ଆତଙ୍କବାଦୀମାନେ ଅନନ୍ତନାଗରେ ପୂର୍ବତନ ପଞ୍ଚ ଆସିଫ ଅଲିଙ୍କୁ ଟାର୍ଗେଟ କରିଥିଲେ। ନାମାଜ ସାରି ମସଜିଦରୁ ଫେରୁଥିବା ବେଳେ ଆତଙ୍କବାଦୀ ତାଙ୍କ ଉପରକୁ ଗୁଳି ଚଳାଇଥିଲେ। ଆହତ ଅବସ୍ଥାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଆହତଙ୍କ ପିତା ଅଲି ମହମ୍ମଦ ଗଣାଇ ପୋଲିସର ଜଣେ ହେଡ କନଷ୍ଟେବଳ ଥିଲେ। ଆତଙ୍କବାଦୀମାନେ ତାଙ୍କୁ ମଧ୍ୟ ୨୯ ଜାନୁୟାରୀରେ ହତ୍ୟା କରିଥିଲେ।