https://youtu.be/i-zKaIe-vAo
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ସଂସଦ ଭିତରେ ଅଜ୍ଞାତ ଯୁବକଙ୍କ ପ୍ରବେଶକୁ ନେଇ ସାରା ଦେଶରେ ହଇଚଇ । କିଏ ଏହି ଯୁବକମାନେ? କ’ଣ ଏମାନଙ୍କ ଉଦେ୍ଦଶ୍ୟ? ତାକୁ ନେଇ ଏବେ ଉଠିଛି ବଡ଼ ପ୍ରଶ୍ନ? କେଉଁ ପରିସ୍ଥିତିରେ ଭାରତୀୟ ଗଣତନ୍ତ୍ରର ମନ୍ଦିର ସଂସଦର ସୁରକ୍ଷା ଢିଲା ହେଲା । ତାହା ହେଲା ତାଠୁ ବି ବଡ଼ ପ୍ରଶ୍ନ । ଅଭେଦ୍ୟ ସୁରକ୍ଷା ବଳୟ ଭିତରେ ଥିବା ସଂସଦରେ ଏଭଳି ଅଭାବନିୟ କାଣ୍ଡ କିପରି ଘଟି ପାରିଲା ତାକୁ ନେଇ ଚାଲିଛି ତଦନ୍ତ । ତେବେ ଆଜିର ଘଟଣାକୁ ନେଇ ଆଉ ଏକ ଦିଗ ଆସୁଛି ଯାହା ଅତ୍ୟନ୍ତ ଚିନ୍ତାଜନକ । ଆଜିକୁ ଠିକ ୨୨ ବର୍ଷ ତଳେ ୨୦୦୧ ଡିସମ୍ବେର ୧୩ରେ ସଂସଦ ଉପରେ ହୋଇଥିଲା ଆକ୍ରମଣ । ସେଇ ସମାନ ତାରିଖରେ ଏଭଳି ଘଟଣା ଘଟିବା କେବଳ ସଂଯୋଗ ନା ଏହା ପଛରେ ରହିଛି ଷଡ଼ଯନ୍ତ୍ର ।
ଅନ୍ୟପକ୍ଷରେ ଖଲିସ୍ତାନୀ ସମର୍ଥକମାନେ ସଂସଦ ଭିତରେ ଡିସେମ୍ବର ୧୩ ରେ ସଂସଦ ଭିତରେ କାଣ୍ଡ ଘଟାଇବାକୁ ପୂର୍ବରୁ ଧମକ ଦେଇଥିଲେ । ଏହିମାନେ ଆଉ ଖଲିସ୍ତାନୀ ଲିଙ୍କରେ ନାହାନ୍ତି ତ? ସେ ଉପରେ ମଧ୍ୟ ଦିଲ୍ଲୀ ପୋଲିସ ତଦନ୍ତ କରୁଛି । ତଦନ୍ତ ଏ କଥାର ମଧ୍ୟ ହେଉଛି, ଏମାନଙ୍କୁ ଲୋକସଭା ଭିତରେ ପ୍ରବେଶ ପାଇଁ ଅନୁମତି ପତ୍ର ଦେବାକୁ କିଏ ସୁପାରିସ କରିଥିଲେ । ଏହି ଘଟଣାରେ ପ୍ରତିକ୍ରିୟା ପ୍ରକାଶ କରି ଲୋକସଭାରେ କଂଗ୍ରେସର ନେତା ଅଧୀର ରଞ୍ଜନ ଚୋଧୁରୀ କହିଛନ୍ତି ।ସେହିଭଳି ସଂସଦ ଭିତରେ ସାଂସଦଙ୍କ ଉଦବେଗ ଦେଖି ବାଚସ୍ପତି ଓମ ବିର୍ଲା ପ୍ରତିକ୍ରିୟା ରଖିଛନ୍ତି । ଘଟଣାର ଗମ୍ଭୀରତାର ସହ ଯାଂଚ କରାଯାଉଛି ବୋଲି ସେ କହିଛନ୍ତି । ବିଶେଷ କରି ଯେଉଁ ସ୍ମୋକ ବମ କଥା କୁହାଯାଉଛି ସେ ଉପରେ ମଧ୍ୟ ବାଚସ୍ପତି ନିଜର ପ୍ରତିକ୍ରିୟା ରଖିଛନ୍ତି ।
ସଂସଦର ସୁରକ୍ଷା ବ୍ୟବସ୍ତା କେତେ କଡା ତା ସମସ୍ତଙ୍କୁ ଜଣା । ନୂଆ ସଂସଦ ଭବନରେ ଏହି କଟକଣା ଆହୁରି ଶକ୍ତିଶାଳୀ କରାଯାଇଥିବା କୁହାଯାଉଛି । ତା ସତ୍ତ୍ୱେ ଏଭଳି ଅଭାବନୀୟ ଘଟଣା ଘଟିଲା । ଏଥିରେ କାହାର କୌଣସି କ୍ଷତି ଘଟିନଥିଲେ ମଧ୍ୟ ଏହା ସଂସଦର ସୁରକ୍ଷା ବ୍ୟବସ୍ଥା ଉପରେ ବିରାଟ ପ୍ରଶ୍ନବାଚୀ ସୃଷ୍ଟି କରିଛି ।
