ଅଟୋ ଡ୍ରାଇଭରଙ୍କ ମାନବିକତା, ଫେରାଇଲେ ୩୦ ହଜାର ଟଙ୍କା
ଭୁବନେଶ୍ୱର (ବଡ଼ ଖବର ବ୍ୟୁରୋ): ଅଟୋ ଡ୍ରାଇଭରଙ୍କ ମାନବିକତା । ୩୦ ହଜାର ଟଙ୍କା ଫେରାଇଲେ ସୁରେନ୍ଦ୍ର ମେହେର । ଦୁଇ ଜଣ ବୃଦ୍ଧା ଆଖି ଅପରେସନ ପାଇଁ ସମ୍ବଲପୁରର ଏକ ଘରୋଇ ହସ୍ପିଟାଲକୁ ଆସିଥିଲେ । ଡାକ୍ତରଖାନାକୁ ଯିବା ପାଇଁ ଅଇଁଠାପାଲି ବସଷ୍ଟାଣ୍ଡରୁ ଏକ ଅଟୋ ଧରିଥିଲେ । ଦୁଇ ବୃଦ୍ଧା ଡାକ୍ତରଖାନା ତ ପହଂଚିଲେ ହେଲେ ଅଟୋରେ ଛାଡ଼ି ଦେଇଗଲେ ୩୦ ହଜାର ଟଙ୍କା ଓ ବ୍ୟାଗ୍ । ମେଡିକାଲକୁ ଯାଇ ଦେଖିଲା ବେଲକୁ ସାଙ୍ଗରେ ଆଣିଥିବା ବ୍ୟାଗ ଓ ଟଙ୍କା ନାହିଁ । ଦୁଇ ବୃଦ୍ଧାଙ୍କ ଭାଲେଣି ପଡ଼ିଗଲା । ଆଖି ହେଲା ଛଳଛଳ । ଅପରେସନ ଥିବାରୁ ଯୋଗାଡ଼ କରିଥିବା ଟଙ୍କା ତାଙ୍କ ପାଖରେ ନାହିଁ ।
କାହାକୁ କହିବେ, ଶୁଣିବ ବା କିଏ । ଏନେଇ ଚିନ୍ତାରେ ଦୁଇ ମାଉସୀ । ସମ୍ବଲପୁର ଅଇଁଠାପାଲି ପୋଲିସ ପାଖରେ ଖବର ପହଂଚିଲା ବେଳକୁ ତା ଆଗରୁ ପହଂଚି ସାରିଥିଲେ ଅଟୋ ଡ୍ରାଇଭର ସୁରେନ୍ଦ୍ର ମେହେର । ଟଙ୍କାର ମୂଲ୍ୟ ସେ ଜାଣିଥିଲେ ଯେ, ଦୁଇ ମାଉସୀଙ୍କ ପାଇଁ ଏହା କେତେ ଗୁରୁତ୍ୱପୁର୍ଣ୍ଣ । ପୋଲିସ ଅଟୋକୁ ଖୋଜିବା ପୂର୍ବରୁ ସୁରେନ୍ଦ୍ର ସେଠାରେ ପହଂଚି ସାରିଥିଲେ । ପୋଲିସକୁ ଟଙ୍କା ବ୍ୟାଗ ଦେବାପରେ ଏହା ଦୁଇ ବୃଦ୍ଧାଙ୍କୁ ମିଳିଥିଲା । ଦୁଇ ଜଣ ଖୁସିରେ ଗଦଗଦ୍ ହେବା ସହ ସୁରେନ୍ଦ୍ରଙ୍କୁ ଆଶୀର୍ବାଦ ଦେଇଥିଲେ । ସୁରେନ୍ଦ୍ରଙ୍କ ଏଭଳି ମହାନତାଙ୍କୁ ସବୁଠି ପ୍ରଶଂସା କରାଯାଉଛି ।