ଘୁମୁସର ମିଳିତ କଳାକାରଙ୍କ ଦାବିପତ୍ର

ଭଞ୍ଜନଗର (ବଡ଼ ଖବର ବ୍ୟୁରୋ): କଳା ଓ କଳାକାର ବଞ୍ଚାଇବା ପାଇଁ ଘୁମୁସର ମିଳିତ କଳାକାର ସଂଘ ପକ୍ଷରୁ ଭଞ୍ଜନଗର ଉପଜିଲ୍ଲାପାଳଙ୍କୁ ଭେଟି ଜିଲ୍ଲାପାଳଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଛି। ଗତ ୯ ମାସ ହେଲା ମହାମାରୀ କରୋନା ପାଇଁ ଲକଡାଉନ, ସଟଡାଉନ ଜାରି ରହିଥିବାରୁ ମଞ୍ଚ କାର୍ୟ୍ୟକ୍ରମ ସମ୍ପୂର୍ଣ୍ଣ ବନ୍ଦ ରହିଛି। ଏପରିକି ଗଞ୍ଜାମର ପ୍ରସିଦ୍ଧ ଦଣ୍ଡଯାତ୍ରା ମଧ୍ୟ କରୋନା ପାଇଁ ଚଳିତ ବର୍ଷ ବନ୍ଦ ହୋଇଛି । ଫଳରେ ଅଞ୍ଚଳର ଶତାଧିକ ମଞ୍ଚ, ବାଦ୍ୟ ଭଳି ବିଭିନ୍ନ କଳାକାରଙ୍କ ରୋଜଗାର ଶୂନ ହୋଇଯାଇଛି। ଏବେ ଏହି କଳା ଉପରେ ନିର୍ଭର କରି ଚଳୁଥିବା ଶତାଧିକ ପରିବାର ବେରୋଜଗାର ହୋଇପଡ଼ିଛନ୍ତି । କୋଭିଡ କଟକଣା ମାନି ଆଜିଯାଏ ଘରେ ବସି ରହିଥିବା ଏହି କଳାକାରମାନେ ଏବେ ପେଟର ଜ୍ୱାଳା ଅସହ୍ୟ ହେବାରୁ ରାଜରାସ୍ତାକୁ ଓହ୍ଲାଇଛନ୍ତି । ଆମ ମଞ୍ଚ ଆମକୁ ଫେରାଇବା ପାଇଁ ଦାବି କରିଛନ୍ତି।