ଗୁଣ୍ଡା ସାଜିଲେ ବିଜେଡି କର୍ମୀ
ବାରିପଦା(ବଡ଼ ଖବର ବ୍ୟୁରୋ): ଗୁଣ୍ଡା ସାଜିଲେ ବିଜେଡି କର୍ମୀ । ପୁଲିସ ସାମ୍ନାରେ ଗୋଡ଼ାଇ ଗୋଡ଼ାଇ ନିର୍ମମ ଭାବରେ ପିଟିଲେ । ମୁଖ୍ୟମନ୍ତ୍ରୀ ମୟୂରଭଞ୍ଜ ଜିଲ୍ଲାରେ ସ୍ମାର୍ଟ ହେଲଥ କାର୍ଡ ବଣ୍ଟନ ସମୟରେ ଏପରି ଏକ ଅଭାବନୀୟ ଘଟଣା ଘଟିଛି । କାର୍ଯ୍ୟକ୍ରମ ସରିବା ପରେ ଜେଏମଏମ ଓ ବିଜେପି କର୍ମକର୍ତ୍ତା ମାନଙ୍କୁ ବିଜେଡି କର୍ମୀ ଅମାନବୀୟ ଭାବେ ମାଡ଼ ମାରିଛନ୍ତି । ଯାହାର ଦୃଶ୍ୟ କ୍ୟାମେରାରେ କଏଦ ହୋଇଛି । ଜେଏମଏମ କର୍ମୀ ମଧୁସୁଦନ ସାହୁ, ବିଜେପି କର୍ମୀ ସୂର୍ଯ୍ୟବଂଶୀ ସୁରଜ ଓ ଦେବାଂଶ ରାଉତଙ୍କୁ ପୁଲିସ ସମ୍ମୁଖରେ ମାଡ ମାରିଥିବାର ଅଭିଯୋଗ କରିଛନ୍ତି ବିଜେପି ଜିଲ୍ଲା ସଭାପତି କାନ୍ଦ୍ରା ସରେନ ।
ସେପଟେ ମମିତା ମେହେରଙ୍କୁ ନ୍ୟାୟ ଦେବା ଦାବିରେ ସମସ୍ତ ବିରୋଧୀ ଦଳ ଏକାଠି ହୋଇ ମନ୍ତ୍ରି ଦିବ୍ୟଶଙ୍କରଙ୍କ ଇସ୍ତଫା ଦାବି କରିଆସୁଛନ୍ତି । ଏପରିକି ଶେଷ ସମୟରେ ଗୃହମନ୍ତ୍ରୀ ଦିବ୍ୟଶଙ୍କରଙ୍କୁ ମୟୂରଭଞ୍ଜ ଗସ୍ତରୁ ବାଦ ଦିଆଯାଇଥିଲା । ହେଲେ କେବଳ ମନ୍ତ୍ରୀଙ୍କୁ ବାଦ ଦେବା ତାହା ନୁହେଁ ବରଂ ମନ୍ତ୍ରୀଙ୍କୁ ଦଳରୁ ଖୁବଶୀଘ୍ର ବହିଷ୍କାର କରାଯାଉ ବୋଲି ବିରୋଧୀ ଦାବି କରିଥିଲେ । ତେବେ ଏହି ଝଗଡ଼ା ଏସବୁକୁ ଦୃଷ୍ଟିରେ ରଖି ବିଜେଡି କର୍ମୀ ଘଟାଇଥିବାର ଅନୁମାନ କରାଯାଉଛି ।