ଖୁଲମଖୋଲା କୋଭିଡ୍ ନିୟମ ଉଲ୍ଲଙ୍ଘନ

ସାଲେପୁର (ବଡ଼ ଖବର ବ୍ୟୁରୋ): ଆଜି ଥିଲା ବିଜେଡିର ୨୪ତମ ପ୍ରତିଷ୍ଠା ଦିବସ । ରାଜ୍ୟବାପୀ ଦଳ ପକ୍ଷରୁ କରାଯାଇଥିଲା ପାଳନ । ବିଭିନ୍ନ ସ୍ଥାନରେ କୋଭିଡ ନିୟମର ଉଲ୍ଲଙ୍ଘନ ହୋଇଥିବା ନଜରକୁ ଆସିଥିଲା । କଟକ ଜିଲ୍ଲା ସାଲେପୁର ଏଥିରୁ ବାଦ ପଡ଼ିନଥିଲା । ସାଲେପୁର ବ୍ଲକ ଗୋପିନାଥପୁରରେ ବିଜେଡି ପ୍ରତିଷ୍ଠା ଦିବସରେ କୋଭିଡ୍ ନିୟମର ଖୁଲମଖୁଲା ଉଲଙ୍ଘନ ହୋଇଥିବା ଦେଖିବାକୁ ମିଳିଥିଲା । ଶହ ଶହ କର୍ମୀ ବିନା ମାସ୍କରେ ବସିଥିଲେ । ଆଉ ସାମାଜିକ ଦୂରତା କଥା ନକହିବା ଭଲ ।

ସାଧାରଣ ଲୋକଙ୍କ କଥା ଛାଡନ୍ତୁ ନେତାମାନେ ମଧ୍ୟ କୋଭିଡ କଟକଣାକୁ ଫୁ କରିଦେଇଥିଲେ । ମଞ୍ଚରେ କୌଣସି ସାମାଜିକ ଦୂରତା ନଥିଲା । ସବୁଠାରୁ ବଡ଼ କଥା ହେଉଛି ବିଧାୟକ ପ୍ରଶାନ୍ତ ବେହେରା ବିନା ମାସ୍କରେ ମଞ୍ଚ ପରିଚାଳନା କରିଥିବା ବେଳେ କଟକ ଜିଲ୍ଲା ବିଜେଡି ସଭାପତି ଦେବାଶିଷ ସାମନ୍ତରାୟ ମଧ୍ୟ ବିନା ମାସ୍କରେ ମଞ୍ଚାସିନ ଥିଲୋ । ଯାହାକୁ ନେଇ ସାଧାରଣରେ ଚର୍ଚ୍ଚା ଜୋର ଧରିଛି ।

ସାଧାରଣ ଲୋକ କୋଭିଡ ନିୟମ ଉଲଙ୍ଘନ କଲେ ଗଣିବାକୁ ପଡିଛି ମୋଟା ଅଙ୍କର ତଣ୍ଡ । ଯାହାର ବହୁ ଜ୍ୱଳନ୍ତ ଉଦାହରଣ ମଧ୍ୟ ପୂର୍ବରୁ ନଜିର ରହିଛି । ଚା ଦୋକାନୀ ହୁଅନ୍ତୁ ବା ଫଳ ଦୋକାନୀ ସମସ୍ତଙ୍କଠାରୁ କୋଭିଡ ନିୟମ ଉଲ୍ଲଙ୍ଘନ କରାଯାଇଥିବା ନେଇ ପୂର୍ବରୁ ଫାଇନ କଟାଯାଇଥିଲା । ମାତ୍ର ବାରମ୍ବାର ରାଜନେତାମାନେ କୋଭିଡ୍ ନିୟମର ଉଲ୍ଲଙ୍ଘନ କରୁଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଉ ନଥିବାକୁ ନେଇ ସାଧାରଣ ଲୋକେ ଉଠାଇଛନ୍ତି ଅନେକ ପ୍ରଶ୍ନ ।
ବିଜେଡି ସୁପ୍ରିମୋ ନବିନ ପଟ୍ଟନାୟକ ରାଜ୍ୟବାସୀଙ୍କୁ କୋଭିଡ ନିୟମ ପାଳନ କରିବାକୁ ନେଇ ବିଭିନ୍ନ ସଚେତନତା ବାର୍ତ୍ତା ବାଣ୍ଟୁଥିବା ବେଳେ ନିଜ ଦଳର ପ୍ରତିଷ୍ଠା ଦିବସରେ ଏଭଳି ଚିତ୍ରକୁ ନେଇ ଜନସାଧାରଣ ଉଠାଇଛନ୍ତି ଅନେକ ପ୍ରଶ୍ନ ।