ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ପଶ୍ଚିମବଙ୍ଗରେ ପୁଣି ଶାସକ ଦଳ ଓ ବିରୋଧୀ ବିଜେପି ଦଳ ମୁହାଁମୁହିଁ ହୋଇଛନ୍ତି । ତେବେ ପଶ୍ଚିମବଙ୍ଗ ସରକାର ବିରୋଧୀଙ୍କୁ ହତ୍ୟା କରିବାକୁ ଚେଷ୍ଟା କରୁଥିବାର ଅଭିଯୋଗ ବାରମ୍ବାର ଭାରତୀୟ ଜନତା ପାର୍ଟି ପକ୍ଷରୁ ଅଭିଯୋଗ ହୋଇଆସୁଛି । ସେପଟେ ଏହାର ଠିକ ବିପରୀତ କଥା କହିଛି ତୃଣମୂଳ କଂଗ୍ରେସ । ସେ ମଧ୍ୟ ଅଭିଯୋଗ କରିଛି ବିଜେପି ତାଙ୍କର ଦଳୀୟ କର୍ମୀମାନଙ୍କୁ ମାଡ଼ ମାରି ନିଜ ଦଳରେ ସାମିଲ କରୁଛି । ଏନେଇ ଉଭୟ ଦଳ ଆରୋପ ପ୍ରତ୍ୟାରୋପ ଦୀର୍ଘଦିନ ଧରି କରିଆସୁଛନ୍ତି । ଏହା ମଧ୍ୟରେ ପଶ୍ଚିମବଙ୍ଗ ସରକାର ବିରୋଧୀଙ୍କୁ ହତ୍ୟା କରିବାକୁ ଚେଷ୍ଟା କରୁଥିବାର ଅଭିଯୋଗ କରିଛନ୍ତି ଭାରତୀୟ ଜନତା ପାର୍ଟିର ସାଧାରଣ ସମ୍ପାଦକ କୈଳାଶ ବିଜୟବର୍ଗିୟ । ତେବେ ଏହି ରାଜ୍ୟରେ ବିରୋଧୀ ଦଳର ନେତାଙ୍କ ବିରୋଧରେ ଗୁରୁତର ଅପରାଧର ମିଥ୍ୟା ମାମଲା ରହିଛି ।
ତଲୱାର ଦେଖାଇ ନେତାଙ୍କୁ ଟିଏମସିରେ ସାମିଲ ହେବାକୁ ଧମକ ଦିଆଯାଉଛି । ବାଧ୍ୟ ହୋଇ ସେମାନେ ବିଜେପି ଛାଡ଼ି ତୃଣମୂଳ କଂଗ୍ରେସରେ ଯୋଗ ଦେଉଛନ୍ତି ବୋଲି ସେ ଅଭିଯୋଗ କରିଛନ୍ତି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟାର୍ଗେଟ କରି ବିଜୟବର୍ଗିୟ କହିଛନ୍ତି । ଯଦି ଗଣତନ୍ତ୍ରରେ ଆଦୌ ବିଶ୍ୱାସ ନଥିବା ଜଣେ ଶାସକ ଦଳର ନାମ ଦେଶର ଇତିହାସରେ ଲେଖାଯିବ । ତେବେ ବାନାର୍ଜୀ ମଧ୍ୟ ଏଥିରେ ଅନ୍ତର୍ଭୁକ୍ତ ହେବେ । ଅନ୍ୟପଟେ ପଶ୍ଚିମବଙ୍ଗରେ ଗତ ବିଧାନସଭା ନିର୍ବାଚନରେ ବିଜେପିର ପରାଜୟ ପରେ ଦଳର ଅନେକ ଟିଏମସିରେ ଯୋଗ ଦେଇଥିବାର ଦେଖିବାକୁ ମିଳିଥିଲା ।
