କୋଭିଡ ଗାଇଡ ଲାଇନକୁ ଫୁ
ଖୋର୍ଦ୍ଧା (ବଡ଼ ଖବର ବ୍ୟୁରୋ): କରୋନା ସଂକ୍ରମଣରେ ଖୋର୍ଦ୍ଧା ଜିଲ୍ଲା ସାରା ରାଜ୍ୟରେ ପ୍ରଥମ ସ୍ଥାନରେ ଥିବାରୁ ଜିଲ୍ଲା ପ୍ରଶାସନ ପାଇଁ ମୁଣ୍ଡବିନ୍ଧାର କାରଣ ହୋଇଛି । ସ୍ଥିତି ସୁଧାରିବା ପାଇଁ ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ସଂକ୍ରମଣ ନିୟନ୍ତ୍ରଣ ପାଇଁ ପ୍ରଶାସନ ଏବେ ପୁଣି ତତ୍ପର ହୋଇପଡିଛି । ଖୋର୍ଦ୍ଧା ସହରରେ ନାଇଟ କର୍ଫ୍ୟୁକୁ କଡ଼ାକଡ଼ି ପାଳନ କରାଯାଉଥିବା ବେଳେ ପୋଲିସ ପକ୍ଷରୁ ଆଜି ସକାଳୁ ମଧ୍ୟ ସହରର ବିଭିନ୍ନ ସ୍ଥାନରେରେ ମାସ୍କ ଚେକିଂ ଜୋରଦାର କରାଯାଇଛି । ନିୟମ ଉଲ୍ଲଙ୍ଘନକାରୀଙ୍କ ଠାରୁ ଜୋରିମାନା ଆଦାୟ କରାଯାଉଛି ।
ସେହିଭଳି ଓ ପୌର ପରିଷଦର ଏନଫୋର୍ସମେଣ୍ଟ ଟିମ ଅଧିକାରୀମାନେ ସହରର ହାବେଳି ପଡ଼ିଆ ପରିବା ମାର୍କେଟ ଠାରୁ ଆରମ୍ଭ କରି ରାସ୍ତା କଡରେ ଅମାନିଆ ଭାବେ ବ୍ୟବସାୟ କରୁଥିବା ଉଠା ଦୋକାନୀଙ୍କ ସହିତ କୋଭିଡ ନିୟମକୁ ପାଳନ କରୁନଥିବା ଲୋକଙ୍କୁ ତାଗିଦ କରି ସେମାନଙ୍କ ଠାରୁ ମଧ୍ୟ ଜୋରିମାନା ଆଦାୟ କରୁଛନ୍ତି ।
ଏ ପଟେ ଜିଲ୍ଲା ପ୍ରଶାସନ ତରଫରୁ ସହର ସାରା ଡ଼ାକବାଜି ଯନ୍ତ୍ର ମାଧ୍ୟମରେ ଜନ ସଚେତନତା ଅଭିଯାନ ଜାରି ରହିଥିବା ବେଳେ କିଛି କ୍ଷେତ୍ରରେ ଲୋକମାନେ କୋଭିଡର ଭୟାବହତାକୁ ଉପଲବ୍ଧି ନକରି ଅତି ହାଲୁକା ଭାବେ ନେଉଥିବା ଦେଖିବାକୁ ମିଳିଛି । ଦୁଇଦିନ ତଳେ ସାରା ସହରର ପ୍ରତ୍ୟେକ ଜଳଖିଆ ଦୋକାନ କିମ୍ବା ହୋଟେଲରେ ଗ୍ରାହକମାନେ ବସି ଖାଇବା ପାଇଁ ବାରଣ କରାଯାଇଛି । କିନ୍ତୁ ବାସ୍ତବ ଚିତ୍ର ଅଲଗା ।