ବଦଳିବ ଚାନ୍ଦବାଲିର ରୂପରେଖ

ଚାନ୍ଦବାଲି(ବଡ଼ ଖବର ବ୍ୟୁରୋ): ପୁରାତନ ବନ୍ଦରନଗରୀ ଚାନ୍ଦବାଲି ସହରର ବଦଳିବ ରୂପରେଖ । ଚାନ୍ଦବାଲିକୁ ବିଶ୍ୱସ୍ତରୀୟ ପର୍ଯ୍ୟଟନସ୍ଥଳ ତଥା ବୈତରଣୀ ନଦୀକୂଳର ସୌନ୍ଦର୍ଯ୍ୟକରଣ କରିବା ପାଇଁ ପୂର୍ବତନ ମନ୍ତ୍ରୀ ତଥା ଯାଜପୁର ବିଧାୟକ ପ୍ରଣବପ୍ରକାଶ ଦାସ କରିଛନ୍ତି କ୍ଷେତ୍ର ପରିଦର୍ଶନ। ବିଦେଶୀ ପର୍ଯ୍ୟଟକ ତଥା ସ୍ଥାନୀୟ ଲୋକଙ୍କର ମନୋରଞ୍ଜନକୁ ଦୃଷ୍ଟିରେ ରଖି ଏହି ପ୍ରକ୍ରିୟା ଅରମ୍ଭ ହେବ । ବିଶେଷକରି ବିଶ୍ୱ ପ୍ରସିଦ୍ଧ ଅଭୟାରଣ୍ୟ ଭିତରକନିକାକୁ ଆସୁଥିବା ରାଜ୍ୟ ଓ ବିଦେଶୀ ପର୍ଯ୍ୟଟକମାନେ ଚାନ୍ଦବାଲିରେ ଥିବା ପର୍ଯ୍ୟଟନ ବିଭାଗ ପକ୍ଷରୁ ଅରଣ୍ୟନିବାସ ସମେତ ବିଭିନ୍ନ ହୋଟେଲରେ ରାତ୍ରୀଯାପନ କରିବା ସହ ଚାନ୍ଦବାଲିରୁ ମଟରବୋଟ ଯୋଗେ ପ୍ରଥମେ ବୈତରଣୀ ନଦୀରେ ଜଳଯାତ୍ରା କରି ଭିତରକନିକା ଅଭୟାରଣ୍ୟକୁ ଯାତ୍ରା କରିଥାନ୍ତି।

ହେଲେ ଚାନ୍ଦବାଲି ସହରରେ ପର୍ଯ୍ୟାପ୍ତ ଭିତିଭୂମୀ ରହିଥିଲେ ମଧ୍ୟ ଆସୁଥିବା ପର୍ଯ୍ୟଟକମାନଙ୍କୁ ଆକୃଷ୍ଟ କରିବା ପାଇଁ କୌଣସି ବ୍ୟବସ୍ଥା ନଥିବାରୁ ପର୍ଯ୍ୟଟକମାନେ ନିରାଶ ହୋଇଥାନ୍ତି। ଏଥିପାଇଁ ଜିଲ୍ଲା ଯୋଜନା ବୋର୍ଡର ଅଧ୍ୟକ୍ଷ ବ୍ୟୋମକେଶ ରାୟଙ୍କ ଉଦ୍ୟମକ୍ରମେ ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯାଇଛି । ଏହିସ୍ଥାନକୁ ବିଶ୍ୱସ୍ତରୀୟ ପର୍ଯ୍ୟଟନସ୍ଥଳ କରିବା ପାଇଁ ବିଧାୟକ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବା ସହ ଆବଶ୍ୟକ ଅନୁଯାୟୀ ସମସ୍ତ ଅର୍ଥ ଯୋଗାଇ ଦେବା ପାଇଁ ବ୍ୟବସ୍ଥା ରହିଛି ।