ସୁଦାନରେ ସଂଘର୍ଷ, ୨୫ ମୃତ ଓ ୧୮୩ ଆହତ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ସୁଦାନର ସେନା ଓ ପାରାମିଲିଟାରି ସୈନିକଙ୍କ ମଧ୍ୟରେ ଭୀଷଣ ସଂଘର୍ଷ । ୨୫ ଜଣ ପ୍ରାଣ ହରାଇଥିବା ବେଳେ ୧୮୩ ଜଣ ଗୁରୁତର ଆହତ ହୋଇଛନ୍ତି। ରାଜଧାନୀ ଖାର୍ତୁମ ନିକଟରେ ଘଟିଥିବା ଏହି ସଂଘର୍ଷରେ ଆହତଙ୍କ ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି। ଆହତମାନଙ୍କ ମଧ୍ୟରୁ କେତେକଙ୍କ ଅବସ୍ଥା ସଙ୍କଟାପନ୍ନ ରହିଛି। ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ୍ ସୁଦାନ ସେନା ଓ ରାପିଡ୍ ସପୋର୍ଟ ଫୋର୍ସ ମଧ୍ୟରେ ଘଟିଥିବା ସଂଘର୍ଷକୁ ନିନ୍ଦା କରିଛନ୍ତି। ତୁରନ୍ତ ସଂଘର୍ଷ ବନ୍ଦ କରି ଶାନ୍ତି ଫେରାଇ ଆଣିବାକୁ ଏବଂ ଉପୁଜିଥିବା ସଙ୍କଟର ସମାଧାନ ପାଇଁ ଆଲୋଚନା କରିବାକୁ ଉଭୟ ପକ୍ଷର ନେତାଙ୍କୁ ଆହ୍ୱାନ ଦେଇଛନ୍ତି।
ଇତି ମଧ୍ୟରେ ଭାରତୀୟ ଦୂତାବାସକୁ ସୁଦାନ ଯାତ୍ରା ସ୍ଥଗିତ ରଖିବାକୁ ଭାରତୀୟମାନଙ୍କୁ ନିବେଦନ କରିଛି। ସେପଟେ ଏହି ସଂଘର୍ଷ ଚାଲିଥିବା ବେଳେ ଗୁଳି ବାଜି ଜଣେ ଭାରତୀୟ ନାଗରିକଙ୍କର ମୃତ୍ୟୁ ଘଟିଛି ବୋଲି ଭାରତୀୟ ଦୂତାବାସ ସୂଚନା ଦେଇଛି। ସେଠୋର ସେ ଚାକିରି କରୁଥିବା ଜଣାପଡ଼ିଛି । ଟ୍ୱିଟ କରି ସୁଦାନସ୍ଥିତ ଭାରତୀୟ ଦୂତାବାସ କହିଛି, ସୁଦାନର ‘ଡାଲ୍ ଗ୍ରୁପ୍ କମ୍ପାନି’ରେ ଚାକିରି କରୁଥିବା ଆଲବର୍ଟ ଅଗେଷ୍ଟାଇନ୍ ନାମରେ ଜଣେ ଭାରତୀୟ ନାଗରିକଙ୍କ ଗୁଳି ବାଜି ମୃତୁ୍ୟ ହୋଇଛି ।