କରୋନା ମୃତକଙ୍କ ପରିବାରକୁ ପ୍ରତି ମାସରେ ୫ ହଜାର ଆର୍ଥିକ ସହାୟତା
ଥିରୁଅନନ୍ତପୁରମ(ବଡ଼ ଖବର ବ୍ୟୁରୋ): ମହାମାରୀ କରୋନାରେ ପ୍ରାଣ ହରାଇଥିବା ଲୋକଙ୍କ ପରିବାର ବର୍ଗଙ୍କ ପାଇଁ ବଡ ଘୋଷଣା ହୋଇଛି । କରୋନାରେ ପ୍ରାଣ ହରାଇଥିବା ଲୋକଙ୍କ ପରିବାର ବର୍ଗଙ୍କ ପାଇଁ କେରଳ ସରକାର ଏଭଳି ଏକ ବଡ ଘୋଷଣା କରିଛନ୍ତି । କେରଳ ସରକାର ପ୍ରତି ମାସରେ ୫ ହଜାର ଟଙ୍କା ଲେଖାଏଁ ଆର୍ଥିକ ସହାୟତା ଘୋଷଣା କରିଛନ୍ତି । ବୁଧବାର ମୁଖ୍ୟମନ୍ତ୍ରୀ ପିନରାୟୀ ବିଜୟନଙ୍କ ଅଧ୍ୟକ୍ଷତାରେ କ୍ୟାବିନେଟ ବୈଠକ ବସିଥିଲା । ଏହି ବୈଠକରେ କରୋନା ମୃତକଙ୍କ ପରିବାରକୁ ୫ ହଜାର ଟଙ୍କା ଲେଖାଏଁ ଦେବାକୁ କ୍ୟାବିନେଟ ନିଷ୍ପତି ନେଇଛି ।
ତେବେ ବିପିଏଲ ଓ ଗରିବ ଲୋକମାନେ ହିଁ ଏହି ସୁବିଧା ପାଇପାରିବେ । କ୍ୟାବିନେଟର ନିଷ୍ପତି ଅନୁସାରେ କରୋନାରେ ପ୍ରାଣ ହରାଇଥିବା ଲୋକ ଯଦି ବିପିଏଲ ତାଲିକାରେ ରହିଥାନ୍ତି, ତାହା ହେଲେ ତାଙ୍କ ପରିବାରକୁ ମାସିକ ୫ ହଜାର ଟଙ୍କା ଲେଖାଏଁ ଆର୍ଥିକ ସହାୟତା ଯୋଗାଇ ଦିଆଯିବ । ସେହିପରି ସେମାନେ ପାଉଥିବା ଆଗରୁ ସରକାରୀ ଯୋଜନାରେ କୈଣସି ବାଧାପ୍ରାପ୍ତ ହେବ ନାହିଁ । ସବୁ ସରକାରୀ ଯୋଜନା ଓ ପେନସନ ବାଦ ଏହି ଆର୍ଥିକ ସହାୟତା ଦିଆଯିବ ।
ସେହିପରି ରାଜ୍ୟର ସବୁ ଲୋକ ଏହାର ଫାଇଦା ପାଇବେ । ରାଜ୍ୟ ବାହାରେ ଯଦି କେରଳର କୌଣସି ଲୋକ ପ୍ରାଣ ହରାଇଥିବେ ତେବେ ସେମାନେ ମଧ୍ୟ ଏହି ସୁବିଧା ପାଇପାରିବେ । ଏ ନେଇ ଆବଶ୍ୟକ ପଦକ୍ଷେପ ନେବାକୁ ଜିଲ୍ଲାପାଳ ଓ ରାଜସ୍ୱ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି । ତେବେ ଆବେଦନର ୩୦ ଦିନ ମଧ୍ୟରେ ଆର୍ଥିକ ସହାୟତାର ବ୍ୟବସ୍ଥା କରାଯିବ ବୋଲି କୁହାଯାଇଛି ।
