ଭାରତୀୟ ସେନାଙ୍କୁ ଅସମ୍ମାନିତ କରୁଛନ୍ତି ରାହୁଲ: ହିମନ୍ତ ବିଶ୍ୱଶର୍ମା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ପୁଣି କଂଗ୍ରେସ ନେତା ରାହୁଲଙ୍କୁ ଟାର୍ଗେଟ କଲେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା । ସେ କହିଛନ୍ତି ରାହୁଲ ଗାନ୍ଧୀ ଲଣ୍ଡନର କେମ୍ବ୍ରିଜ ବିଜନେସ ସ୍କୁଲରେ ନିଜ ଟିପ୍ପଣୀ ରଖି ଦେଶକୁ ବଦନାମ କରିବାକୁ ଚେଷ୍ଟା କରିଛନ୍ତି । ହିମନ୍ତ କହିଛନ୍ତି ରାହୁଲ ବିଦେଶ ମାଟିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦଙ୍କୁ ଟାର୍ଗେଟ କରିଛନ୍ତି । ଭାରତ ଯୋଡୋ ଯାତ୍ରା ସମୟରେ ରାହୁଲ ଆତଙ୍କବାଦୀଙ୍କୁ ଦୂରରୁ ଦେଖିଥିଲେ ।
ତାଙ୍କ ପାଖକୁ ଆସି ଜଣେ ବ୍ୟକ୍ତି ଆତଙ୍କବାଦୀଙ୍କ ଆଡକୁ ଇସାରା କରିଥିଲେ । ଶର୍ମା ଏବେ ପ୍ରଶ୍ନ କରିଛନ୍ତି ଯେ ରାହୁଲ ଗାନ୍ଧୀ ଏ ସମ୍ପର୍କରେ ସୁରକ୍ଷା ଏଜେନ୍ସିକୁ କାହିଁକି ସୂଚନା ଦେଲେ ନାହିଁ । ରାହୁଲ ଗାନ୍ଧୀ ପୁଲୱାମା ଆତଙ୍କବାଦୀ ଆକ୍ରମଣକୁ କାର ବୋମା ବିସ୍ଫୋରଣ ବୋଲି କହିଥିଲେ । ଏହି ବିସ୍ଫୋରଣରେ ୪୦ ଯବାନ ସହିଦ ହୋଇଥିବା ରାହୁଲ କହିଥିଲେ । ଶର୍ମା କହିଛନ୍ତି ରାହୁଲ ଗାନ୍ଧୀ ଆମ ସେନାଙ୍କର ଅପମାନ କରିଛନ୍ତି । ହେଲେ ସେ ଏତେ ସାହସ କଲେ କେମିତି ? ଏହା ବୋମା ନ ଥିଲା ବରଂ ଆତଙ୍କବାଦୀ ଆକ୍ରମଣ ଥିଲା ବୋଲି ହିମନ୍ତ କହିଛନ୍ତି ।