ନକଲି କରୋନା ଔଷଧ କାରଖାନା ସିଲ, ୭ ଗିରଫ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଦେଶରେ ବଢିବାରେ ଲାଗିଛି କରୋନା ଗ୍ରାଫ । ଚିନ୍ତାରେ ଦେଶବାସୀ । କରାନାକୁ ମାତ ଦେବା ପାଇଁ ଚାଲିଛି ଟିକାକରଣ । ତଥାପି ଟିକାର ଅଭାବ ଦେଖାଦେଉଛି । କିନ୍ତୁ ଏହାରି ଭିତରେ ସାମ୍ନାକୁ ଆସିଛି ଏକ ଦୁଃଖଦ ଘଟଣା । କରୋନା ସଂକ୍ରମଣରେ ପ୍ରତିଦିନ ସାରାଦେଶରେ ହଜାର ହଜାର ଲୋକଙ୍କ ମୃତ୍ୟୁ ହେଉଥିବାବେଳେ, ଜୀବନ ରକ୍ଷାକାରୀ ଔଷଧ କରାଯାଉଛି ଜାଲି । ଅଧିକ ଲାଭର ଲୋଭରେ ସକ୍ରିୟ ହୋଇପଡିଛନ୍ତି ମେଡିସିନ ମାଫିଆ ।
ଏହି ଷଡ଼ଯନ୍ତ୍ରର ପର୍ଦ୍ଦାଫାର୍ଶ କରିଛି ଦିଲ୍ଲୀ କ୍ରାଇମବ୍ରାଞ୍ଚ ପୋଲିସ । ଏଭଳି ଘଟଣା ଘଟିଛି ଉତ୍ତରାଖଣ୍ଡ କୋଟଦ୍ୱାରର ଏକ ଔଷଧ ଫ୍ୟାକ୍ଟିରେ । ନକଲି ରେମଡ଼େସିଭିର ଔଷଧ ତିଆରି କରାଯାଉଥିବା ବେଳେ ଏହା ଉପରେ ଚଢାଉ କରିଛି ଦିଲ୍ଲୀ କ୍ରାଇମବ୍ରାଂଚ ପୋଲିସ । ୭ ଜଣଙ୍କୁ ଗିରଫ କରିବା ସହ ୧୯୬ଟି ଇଞ୍ଜେକ୍ସନ ଜବତ କରିଛି । ଗୋଟିଏ ଇଞ୍ଜେକ୍ସନକୁ ମାଫିଆମାନେ ୨୫ ହଜାରରୁ ଅଧିକ ଟଙ୍କା ବିକ୍ରି କରୁଥିବା ସୂଚନା ମିଳିଛି ।