ଗୁଣୁପୁର, (ବଡ଼ ଖବର ବ୍ୟୁରୋ): ୧୪ ଦଫା ଦାବି ନେଇ ଆଜି ସିପିଆଇ ଏମ୍ଏଲ୍ ଲିବରେସନ ଓ ବିଭିନ୍ନ କୃଷକ ସଙ୍ଗଠନ ପକ୍ଷରୁ ରାୟଗଡ଼ା ଜିଲ୍ଲା ଗୁଣୁପୁରଠାରେ ବିକ୍ଷୋଭ ପ୍ରଦର୍ଶନ ଓ ରାସ୍ତାରୋକ କରାଯାଇଛି। ନୂଆ ବସଷ୍ଟାଣ୍ଡଠାରୁ ଶୋଭାଯାତ୍ରା ବାହାରି ବାଇପାସ ଛକଠାରେ ବିକ୍ଷୋଭ ପ୍ରଦର୍ଶନ କରାଯିବା ପରେ ପ୍ରାୟ ଘଣ୍ଟାଏ ପର୍ୟ୍ୟନ୍ତ ରାସ୍ତାରୋକ କରାଯାଇଥିଲା। ବହୁ ପୁରୁଷ, ମହିଳା ହାତରେ ନାଲି ରଙ୍ଗର ପତାକା ଧରି ଶୋଭାଯାତ୍ରାରେ ସାମିଲ ହେବା ସହ ବିକ୍ଷୋଭ ପ୍ରଦର୍ଶନ କରି ରାସ୍ତାରେ ବସିରହିଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଆନ୍ଦାଳନକାରୀଙ୍କୁ ରାସ୍ତାରୁ ଉଠାଇଥିଲା। କୃଷି ଋଣ ଛାଡ଼, ସଂଶୋଧିତ କୃଷି ଆଇନକୁ ବାତିଲ କରିବା, ପ୍ରାକୃତିକ ବିପର୍ୟ୍ୟୟରେ ଚାଷୀଙ୍କୁ ଆର୍ଥିକ ସହାୟତା ପ୍ରଦାନ, ଏମଜିଏନଆରଇଜିଏ କାର୍ୟ୍ୟରେ ଦୁଇ ଶହ ଦିନ କାର୍ୟ୍ୟ ଯୋଗାଇଦେବା, ଆଦିବାସୀଙ୍କୁ ଜଙ୍ଗଲ ଜମି ଓ ଜଳ ଅଧିକାର ପ୍ରଦାନ ଭଳି ୧୪ ଦଫା ଦାବି ନେଇ ଦଳୀୟ ନେତା ତିରୁପତି ଗମାଙ୍ଗଙ୍କ ନେତୃତ୍ୱରେ କାର୍ୟ୍ୟକ୍ରମ ଅନୁଷ୍ଠିତ ହୋଇଥିଲା।
