ହଟିଛି କର୍ଫ୍ୟୁ, ଗ୍ରାଉଣ୍ଡ ଜିରୋରେ କେନ୍ଦ୍ରୀୟ ଟିମ
ସମ୍ବଲପୁର (ବଡ଼ ଖବର ବ୍ୟୁରୋ): ସମ୍ବଲପୁର ସହରକୁ ଫେରୁଛି ଶାନ୍ତି । ଜନଜୀବନ ଠାରୁ ଆରମ୍ଭ କରି ଦୋକାନ ବଜାର ସବୁଠି ସ୍ୱାଭାବିକ ସ୍ଥିତି । ପୂର୍ବ ଅବସ୍ଥାକୁ ଫେରିଛି ପଶ୍ଚିମ ଓଡ଼ିଶାର ପ୍ରମୁଖ ସହର । ହଟିଛି କର୍ଫ୍ୟୁ, ୧୪୪ ଧାରା । ହେଲେ ଏହାରି ଭିତରେ ସମ୍ବଲପୁର ସାମ୍ପ୍ରଦାୟିକ ହିଂସା ଘଟଣାରେ ଆଜି ସ୍ଥିତି ଅନୁଧ୍ୟାନ କରିବେ ବିଜେପିର ୪ ଜଣିଆ କେନ୍ଦ୍ରୀୟ ଟିମ୍ । ମୃତକଙ୍କ ପରିବାରଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି । ଏହି ଟିମରେ ଅଛନ୍ତି ଉତ୍ତରପ୍ରଦେଶ ରାଜ୍ୟସଭା ସାଂସଦ ବ୍ରଜଲାଲ, ଝାଡଖଣ୍ଡ ରାଜ୍ୟସଭା ସାଂସଦ ସମୀର ଓରାଓଁ, ଆଦିତ୍ୟ ସାହୁ ଓ ପଶ୍ଚିମବଙ୍ଗ ପୁରୁଲିଆ ସାଂସଦ ଜ୍ୟୋର୍ତିମୟ ସିଂ ମାହତୋ ।
ହିଂସାକାଣ୍ଡରେ ଆହତ ବ୍ୟକ୍ତି ଓ ମୃତ୍ୟୁବରଣ କରିଥିବା ଚନ୍ଦ୍ରକାନ୍ତ ମିର୍ଦ୍ଧାଙ୍କ ପରିବାର ଲୋକଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ସ୍ଥିତି ଅନୁଧ୍ୟାନ ପରେ ଟିମ୍ ସବିଶେଷ ତଥ୍ୟ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କୁ ପ୍ରଦାନ କରିବେ । ୪ ଜଣିଆ ଟିମ୍ ମୁଖ୍ୟ ସାଂସଦ ବ୍ରଜଲାଲ ଓଡ଼ିଶା ପହଂଚିବା ପରେ ପୋଲିସ ବିଭାଗକୁ ଦାୟୀ କରିଛନ୍ତି । ସୁରକ୍ଷା ବ୍ୟବସ୍ଥା ଉଠାଇଛନ୍ତି ପ୍ରଶ୍ନ । ଗତକାଲି ବିଜେପି ଟିମ୍ ଝାରସୁଗୁଡ଼ା ବିମାନବନ୍ଦରରେ ପହଂଚିବା ପରେ ସମ୍ବଲପୁରରେ ରାତ୍ରୀଯାପନ କରିଥିଲେ ।