ଧୋନୀ ଏବେ ବି ଫିଟ ଅଛନ୍ତି : ୱାଟସନ
ମୁମ୍ବାଇ (ବଡ଼ ଖବର ବ୍ୟୁରୋ): ବିଶ୍ୱର ସବୁଠାରୁ ବଡ ତଥା ଧନୀ କ୍ରିକେଟ୍ ଲିଗ ଆଇପିଏଲର ୧୬ ତମ ସସ୍କରଣ ଆରମ୍ଭ ହେବାକୁ ଯାଉଛି । ଆଉ ମାତ୍ର ୧୦ ଦିନ ପରେ ଆରମ୍ଭ ହେବ କ୍ରିକେଟ ମହାକୁମ୍ଭ । ଚଳିତ ସିଜିନ୍ ଟିମ୍ ଇଣ୍ଡିଆର ପୂର୍ବତନ କ୍ୟାପଟେନ୍ ମହେନ୍ଦ୍ର ସିଂହ ଧୋନୀଙ୍କ ପାଇଁ ଐତିହାସିକ ସିଜିନ ହେବାକୁ ଯାଉଥିବାବେଳେ, ଏହି ସିଜିନ୍ ତାଙ୍କ ଆଇପିଏଲ୍ କ୍ୟାରିୟରର ଶେଷ ସିଜିନ୍ ହୋଇପାରେ ବୋଲି ମଧ୍ୟ ଆଲୋଚନା କରାଯାଉଛି । ତେବେ ଏହାରି ଭିତରେ ପୂର୍ବତନ ଅଷ୍ଟ୍ରେଲୀୟ ଖେଳାଳି ତଥା ଚେନ୍ନାଇ ସୁପର କିଙ୍ଗର ଭେଟେରାନ୍ ବ୍ୟାଟ୍ସମ୍ୟାନ୍ ସେନ୍ ଓ୍ୱାଟସନ ମହେନ୍ଦ୍ର ସିଂ ଧୋନୀଙ୍କ ଆଇପିଏଲ୍ କ୍ୟାରିୟରକୁ ନେଇ ବଡ ବୟାନ ଦେଇଛନ୍ତି ।
ଦୋହାରେ ଲିଜେଣ୍ଡ ଲିଗ୍ କ୍ରିକେଟ୍ ଖେଳୁଥିବା ୱାଟସନ କହିଛନ୍ତି ଧୋନୀ ଏତେ ଫିଟ୍ ଅଛନ୍ତି ଯେ, ସେ ଆଗାମୀ ୩ରୁ ୪ଟି ଆଇପିଏଲ୍ ସିଜିନ୍ ଖେଳିପାରିବେ । ଜାତୀୟ ଗଣମାଧ୍ୟମ ସଂସ୍ଥାକୁ ବାଇଟ୍ ଦେଇ ସେ କହିଛନ୍ତି, “ମୁଁ ଶୁଣୁଛି ଏ ବର୍ଷ ଆଇପିଏଲ୍ ଧୋନୀଙ୍କ ଶେଷ ଆଇପିଏଲ୍ ହୋଇପାରେ, ହେଲେ ମୋତେ ସେମିତି ଲାଗୁନି । ଧୋନୀ ଏବେ ବି ବହୁତ ଫିଟ୍ ଅଛନ୍ତି । ଆଗାମୀ ୩-୪ ବର୍ଷ ପର୍ଯ୍ୟନ୍ତ ସେ ଖେଳ ଜାରି ରଖିପାରିବେ । ତାଙ୍କ କ୍ୟାପଟେନ୍ସି ମଧ୍ୟ ଶାନଦାର୍ ରହିଛି ।
ଗ୍ରାଉଣ୍ଡ ଉପରେ ତାଙ୍କର ଚାଲାକି ହିଁ, ତାଙ୍କ ସଫଳତା ପଛର କାରଣ ।” ସୂଚନାଯୋଗ୍ୟ ଯେ, ଆସନ୍ତା ମାର୍ଚ୍ଚ ୩୧ ତାରିଖରୁ ଆରମ୍ଭ ହୋବାକୁ ଯାଉଛି ଇଣ୍ଡିଆନ୍ ପ୍ରିମିୟର ଲିଗ୍ । ଏଥିପାଇଁ ଟିମ୍ ଇଣ୍ଡିଆର ପୂର୍ବତନ ଅଧିନାୟକ ପ୍ରସ୍ତୁତି ଚଳାଇଛନ୍ତି । ଏଥର ମଧ୍ୟ ଧୋନୀ ସିଏସକେର ନେତୃତ୍ୱ ନେବେ । ଚଳିତ ବର୍ଷ ଖେଳ ଆରମ୍ଭ ହେବା ପୂର୍ବରୁ ଚେନ୍ନାଇ ସୁପରକିଂସର ଖେଳାଳିମାନେ ନେଟ ପ୍ରାକ୍ଟିସ କରୁଥିବାର ନଜର ଆସିଛନ୍ତି ।
